«Ինչո՞ւ դիտորդները չէին զոհվում ԼՂ-ում»․ Զախարովան խեղաթյուրում է ԵՄ առաքելության մանդատի իմաստը

Ռուսաստանի Դաշնության արտաքին գործերի նախարարության ներկայացուցիչ Մարիա Զախարովան հոկտեմբերի 4-ի ճեպազրույցում մեղադրել է Հայաստանում տեղակայված ԵՄ դիտորդական առաքելությանը՝ սեպտեմբերի 19-ին Արցախում ադրբեջանական ագրեսիայի ընթացքում «ստորագույն կեցվածք դրսևորելու» համար։ 

«ԵՄ դիտորդները չէին հայտնվում կրակի տակ, որից ողբերգական ձևով զոհվեցին ռուս խաղաղապահները»,— ասել է Զախարովան։ 

Ադրբեջանական հարձակման հետևանքով սեպտեմբերի 20-ին Արցախում 6 ռուս խաղաղապահ է զոհվել։ Բաքուն, պնդելով, թե «դեպքը սխալմամբ է տեղի է ունեցել», ռուսական կողմին դրամական փոխհատուցում է առաջարկել։ 

«Փաստերի ստուգման հարթակն» ուսումնասիրեց 2023 թվականից Հայաստանում երկու տարի ժամկետով տեղակայված ԵՄ դիտորդական առաքելության պարտավորություններն ամրագրող փաստաթղթերն ու պարզեց, որ Զախարովան մանիպուլացնում է առաքելության մանդատի էությունը։ 

ՌԴ ԱԳՆ ներկայացուցիչը, մեղադրելով եվրոպացի դիտորդներին Արցախում ադրբեջանական վերջին ագրեսիայի ընթացքում անգործություն դրսևորելու մեջ, փաստացի, նրանց է վերագրում պարտավորություններ, որոնք չեն բխում առաքելության մանդատից։ 

Դիտորդական առաքելության նպատակը, պարտավորությունների շրջանակն ու գործունեության աշխարհագրությունը վերաբերում են բացառապես հայ-ադրբեջանական սահմանին․ ըստ դիտորդների մանդատը նկարագրող փաստաթղթի, առաքելությունը հետևում է հայ-ադրբեջանական սահմանի՝ ՀՀ կողմի երկայնքով անվտանգային իրավիճակին։  

Փաստացի, առաքելության նպատակն է նպաստել բացառապես Հայաստանի սահմանամերձ շրջաններում կայունության հաստատմանը, և այն չի տարածվում Լեռնային Ղարաբաղի վրա։  

Զախարովայի համեմատությունը, թե դիտորդները «չէին հայտնվում կրակի տակ, որից զոհվում էին ռուս խաղաղապահները», նույնպես մանիպուլյատիվ է․ դիտորդներն օբյեկտիվորեն՝ իրենց մանդատով պայմանավորված, չէին կարող գտնվել Լեռնային Ղարաբաղում, հետևաբար՝ նաև հայտնվել ադրբեջանական կրակի տակ՝ ի տարբերություն ռուս խաղաղապահների։ 

Այսպիսով, Զախարովան, մանիպուլացնելով ԵՄ դիտորդների մանդատի էությունը, նրանց է վերագրում ԼՂ-ում վերջին զարգացումների պատասխանատվությունը։ 

Նանե Մանասյան