Թվաբանություն ըստ Ալիևների․Ի՞նչ 20 տոկոսի մասին է խոսքը

Օրերս Ադրբեջանի նախագահի աշխատակազմի ղեկավար Ալի Հասանովը երկրի գիտությունների ազգային ակադեմիայում ելույթ ունենալիս հայտարարել է, որ Ադրբեջանի տարածքի 20 տոկոսը, այդ թվում՝ Իրան-Ադրբեջան սահմանի 132 կմ երկարությամբ սահմանը և Հայաստան-Ադրբեջան 733 կմ երկարությամբ սահմանը, գտնվում են Հայաստանի ԶՈՒ «օկուպացիայի» ներքո:

Մի կողմ թողնելով «օկուպացիա» տերմինի քննարկումը, փորձենք պարզել, ճշտել Հասանովի ներկայացրած թվերը:

20 տոկոս

Հասանովը, մեղմ ասած, միակը չէ, ով պնդում է, որ հայկական կողմը իբր Ադրբեջանից «խլել է» տարածքի 20 տոկոսը: Առաջին անգամ այդ թիվը հնչեցրել է Հեյդար Ալիևը՝ 1994 թվականին:

Ադրբեջանի Հանրապետության միջազգային ճանաչված տարածքի (այդ թվում՝ Արցախը) ընդհանուր մակերեսը 86.600 քառակուսի կիլոմետր է: Լեռնային Ղարաբաղի Հանրապետության ընդհանուր մակերեսը (ներառյալ ԼՂՀ վերահսկման տակ բոլոր տարածքները) 11.500 քառակուսի կիլոմետր:

Պարզ թվաբանությամբ կարելի է հեշտությամբ հաշվել, որ հայկական վերահսկողության տակ է Ադրբեջանի տարածքի ոչ թե 20, այլ ընդամենը 13,3 տոկոսը:

733 կմ

Այն սահմանը, որը ըստ Ալի Հասանովի «օկուպացված է», փաստացի, Հայաստան-Լեռնային Ղարաբաղ սահմանն է (նախկին Հայկական ՍՍՀ-ի ու Ադրբեջանական ՍՍՀ-ի սահմանի՝ այժմ հայկական ուժերի կողմից վերահսկվող հատվածը):

Դժվար չէ յուրաքանչուր քարտեզի վրա հաշվել, որ այդ սահմանահատվածի երկարությունը ոչ թե 733, այլ մոտ 390 կմ է: Հետևապես, պարոն Հասանովի հայտարարած թիվը, մեղմ ասած, հեռու է իրականությունից: