ՆԳՆ-ն տվյալներ է կեղծում. վարչապետի շարասյան կողմից հետիոտնային անցման վրա կնոջ վրաերթի դեպքը դուրս է մնացել վիճակագրությունից

«Փաստերի ստուգման հարթակը» նոյեմբերի 27-ին հարցում էր ուղարկել ՀՀ ներքին գործերի նախարարություն՝ խնդրելով տրամադրել 2018-ից մինչև 2023 թվականի հոկտեմբեր ամիսը ներառյալ Երևան քաղաքում վրաերթի դեպքերի վիճակագրությունը։ 

Նախարարությունը սահմանված ժամկետում պատասխանել է հարցմանը՝ տրամադրելով վերոհիշյալ ժամանակահատվածում վրաերթերի վիճակագրությունը։ Ըստ այդմ՝ 2018-ին գրանցվել է հետիոտնի վրաերթի 695 դեպք․ մահացու ելքով և հետիոտնային անցման վրա դեպքերի վերաբերյալ թիվ նշված չէ։ 

Ըստ ՆԳՆ տվյալների՝ 2019 թվականին գրանցվել է վրաերթի 775 դեպք․ դրանցից 61-ը՝ մահացու ելքով, և 6-ը՝ հետիոտնային անցման վրա։ 2020-ին գրանցվել է 490 դեպք, որից մահվան ելքով՝ 33-ը, և հետիոտնային անցման վրա՝ 6-ը։ 2021-ին գրանցվել է վրաերթի 684 դեպք, որից 44-ը՝ մահվան ելքով, և 2-ը՝ հետիոտնային անցման վրա։ 

Նախարարության տրամադրած տվյալների համաձայն, 2022 թվականին վրաերթի 626 դեպք է գրանցվել, այդ դեպքերից 36-ն ունեցել են մահվան ելք։ Նախարարությունը, սակայն, հարցման պատասխանի մեջ 2022-ին հետիոտնային անցման վրա վրաերթի դեպքերի թիվը 0 է ներկայացրել։ 

FIP.am-ը նկատեց, որ նախորդ տարի հետիոտնային անցման վրա վրաերթի առնվազն մեկ դեպք հայտնի է հասարակությանը․ 2022 թվականի ապրիլի 26-ի երեկոյան ՀՀ վարչապետ Նիկոլ Փաշինյանին ուղեկցող ավտոշարասյան առաջին մեքենան Լեո-Պարոնյան փողոցների խաչմերուկում վրաերթի ենթարկեց 28-ամյա հղի կնոջը։   

Հրապարակված տեսագրությունում երևում է, որ կինը վրաերթի է ենթարկվել հենց հետիոտնային անցման վրա։ 

Ուշադրություն․ զգայուն բովանդակություն։ 

Փաստացի, ՀՀ ներքին գործերի նախարարությունը 2022 թվականի վիճակագրության մեջ չի ներառել հետիոտնային անցման վրա գրանցված վրաերթի այդ դեպքը՝ պնդելով, որ առհասարակ նման հանգամանքներում վրաերթի դեպքեր այդ տարի չեն եղել։ 

Ավելի վաղ FIP.am-ը ներկայացրել էր նաև հանցավորության դեմ պայքարի վերաբերյալ ոստիկանության ներկայացրած վիճակագրության և իրական պատկերի միջև եղած խզումը․ բացահայտված հանցագործությունները մի քանի անգամ ավելի քիչ են, քան ներկայացնում է ոստիկանության վիճակագրությունը։

Նանե Մանասյան