Ապօրինի ծագումով գույքի որքան մասն է վերադարձվել պետությանը՝ օրենքի ընդունումից 4 տարի անց․ ինֆոգրաֆիկա

2018 թվականից ՀՀ վարչապետի պաշտոնը ստանձնած Նիկոլ Փաշինյանի հիմնական խոստումներից էր նախկին իշխանություններից ու նրանց հետ փոխկապակցված շրջանակներից «թալանը կոպեկ առ կոպեկ» հետ բերելը։ 

2020 թվականի ապրիլին Ազգային ժողովն այդ նպատակով ընդունեց «Ապօրինի ծագում ունեցող գույքի բռնագանձման մասին» ՀՀ օրենքը: «Փաստերի ստուգման հարթակը» պարզել է, թե օրենքի ընդունումից ի վեր ինչ ծավալների գույք ու դրամական միջոցներ են վերադարձվել պետությանը։ 

Այսպես, ՀՀ գլխավոր դատախազությունը, FIP.am-ի հարցմանն ի պատասխան, հայտնել է, որ 2024 թվականի հունվարի դրությամբ Դատախազության՝ ապօրինի ծագում ունեցող գույքի բռնագանձման գործերով վարչությունը նախաձեռնել է ընդհանուր մոտ 440 ուսումնասիրություն։ 

Դրանցից 94 հայցադիմում քննվում է Հակակոռուպցիոն դատարանում, որից 8-ն են դեռևս բուն դատաքննության փուլում։ 

Հակակոռուպցիոն դատարանում հայտնված գործերով Դատախազությունը պահանջում է պետությանը վերադարձնել 1050 անշարժ և 210 շարժական գույք։ Ներկայացված հայցադիմումների ընդհանուր արժեքը գերազանցում է 510 մլրդ դրամը։ 

Դատախազությունը, սակայն, թվով 4 հաշտության համաձայնություններով է միայն դեռևս վերադարձրել բռնագանձման ենթակա գույք․ խոսքը 6 անշարժ, 1 շարժական գույքի և 80 մլն դրամի մասին է։ Կնքված հաշտությունների ընդհանուր հանրագումարային արժեքը 2 մլրդ 200 մլն դրամ է, ինչը կազմում է բռնագանձման ենթակա գույքի ընդհանուր հանրագումարային արժեքի ընդամենը 0․4%-ը:

Փաստացի, ապօրինի գույքի բռնագանձման մասին օրենքի ընդունումից մոտ 4 տարի անց Դատախազությունը վերադարձրել է այս պահի դրությամբ բռնագանձման ենթակա գույքի դեռևս չնչին մասը։ 

Նանե Մանասյան