Համաշխարհային տնտեսության անկո՞ւմ

Երեկ Սերժ Սարգսյանը Սանկտ-Պետերբուրգում կայացած Եվրասիական տնտեսական բարձրագույն խորհրդի նիստին, խոսելով ԵԱՏՄ կայացվածության մասին հայտարարեց, որ «…Միության ստեղծման և գործունեության հետ կապված բիզնեսի և քաղաքացիների սպասումները, ինչպես նաև վերջինիս դերակատարությունը տնտեսության արդիականացման և քաղաքացիների կյանքի որակի բարելավման գործում մնում են չիրականացված: Իրավական հիմքը մասամբ ձևավորված է, բայց պահպանվում են ինտեգրացիոն ներուժի օգտագործման սահմանափակումներ, ինչը, մեր կարծիքով, թույլ չի տալիս օպերատիվ արձագանքել համաշխարհային տնտեսության վատթարացող իրավիճակին:»:

Եկեք փորձենք հասկանալ, թե իրականում ի՞նչ վիճակում է համաշխարհային տնտեսությունը:

Այսպիսով, համաշխարհային ՀՆԱ-ն 2016 թվականին 2015-ի համեմատ կաճի 3,5 տոկոսով: Իսկ 2015-ին նույն ցուցանիշը 2014-ից ավել էր 3,2 տոկոսային կետով: Ավելին, վերջին 20 տարում միմիայն 2009 թվականն էր, երբ համաշխարհային ՀՆԱ-ն արձանագրեց անկում (0,8 տոկոսով):

Նշենք նաև, որ այս տարի Ռուսաստանի ՀՆԱ-ն, ըստ արժույթի միջազգային հիմնադրամի կանխատեսման, արձանագրելու է շուրջ 16 տոկոսանոց անկում (2015 թվականի համեմատ): Սակայն, Ռուսաստանի տնտեսությունը համաշխարհային տնտեսության ընդամենը 1,7 տոկոսն է կազմում (համաշխարհային ՀՆԱ-ի մոտ մեկ 60-րդ մասը): Եվ Ռուսաստանի կամ ԵԱՏՄ-ի տնտեսության վիճակով դատել համաշխարհային տնտեսության մասին սխալ է:

Ավելին, արդարացի չէ նաև ԵԱՏՄ տնտեսական խնդիրները և միության ՀՆԱ-ի անկումը պայմանավորել համաշխարհային տնտեսության վիճակով: