Չելենտանոյի մահվան մասին լուրը կեղծ է․ ռուսալեզու ալիքը դիտումներ է հավաքում հայտնիների «մահով»

Ռուսալեզու «5 րոպե առաջ»  (5 Минут Назад) կոչվող YouTube-յան ալիքը նոյեմբերի 18-ին մի տեսանյութ է տարածել, որում պնդում է, թե իբր իտալացի աշխարհահռչակ երգիչ, կինոդերասան Ադրիանո Չելենտանոն մահացել է։ 

Լուրը տարածվել է նաև սոցիալական մեդիայի հայաստանյան տիրույթում․ որոշ օգտատերեր գրառումներ են արել դրա վերաբերյալ։ 

«Փաստերի ստուգման հարթակն» ուսումնասիրել է իտալական ու միջազգային մամուլն ու պարզել, որ հայտնի արտիստի մահվան մասին որևէ արժանահավատ աղբյուր չի հայտնել։

Միևնույն ժամանակ, Fip.am-ն ուսումնասիրել է լուրը տարածած ռուսալեզու YouTube-յան ալիքն ու պարզել, որ այն նախկինում ևս կեղծ լուրեր է տարածել հայտնի արտիստների մահվան մասին։ Օրինակ՝ ալիքը մոտ մեկ ամիս առաջ էլ նման տեղեկություններ էր տարածել հուլիվուդյան հայտնի դերասաններ Լեոնարդո դի Կապրիոյի և Քեյթ Ուինսլեթի մասին։ 

Փաստացի, YouTube-յան ալիքը զբաղված է պարբերաբար հայտնիների մահվան մասին կեղծ լուրեր տարածելու միջոցով հարյուր հազարավոր դիտումներ հավաքելով։ 

Այսպիսով, Ադրիանո Չելենտանոյի մահվան մասին լուրը կեղծ է։ 

Նանե Մանասյան