«Ցանկացած հարցումով» «Հայաստան» դաշինքը 2-րդ ուժը չէ․ Խամոյանը սխալվում է

ԱԺ «Հայաստան» խմբակցության պատգամավոր Ագնեսա Խամոյանը 168 TV-ի տաղավարում պնդել է, թե «ցանկացած հարցումով» իրենց քաղաքական ուժը վարկանիշով երկրորդն է Հայաստանում։ 

 «Վերցրե՛ք ցանկացած հարցում, դա իրականացրած կլինի Նիկոլ Փաշինյանն Ազգային անվտանգության ծառայության միջոցով, դա իրականացրած կլինի Gallup-ը, կամ որևէ այլ կազմակերպություն, ցանկացած հարցման դեպքում, միևնույնն է՝ երկրորդ քաղաքական ուժը մնում է «Հայաստան» դաշինքը»,- ասել է պատգամավորը։ 

«Փաստերի ստուգման հարթակն» ուսումնասիրել է քաղաքական ուժերի և կուսակցությունների վարկանիշը ներկայացնող հանրային կարծիքի վերջին հրապարակված հետազոտությունները՝ պարզելու պատգամավորի խոսքերի ճշմարտացիությունը։ 

Այսպես, Խամոյանի հիշատակած Gallup International Аssociation-ի հայաստանյան ներկայացուցչությունը, որը որևէ կապ չունի միջազգայնորեն ճանաչված Gallup Inc.-ի հետ, ընթացիկ տարվա նոյեմբերին է հրապարակել քաղաքական ուժերի վերաբերյալ հանրային կարծիքի իր վերջին ուսումնասիրությունը։ 

«Հայաստան» դաշինքը, դրա համաձայն, իսկապես, դրական՝ 6․4% վարկանիշով երկրորդ ուժն է կառավարող «Քաղաքացիական պայմանագիր» կուսակցությունից հետո։ 

Դաշինքը, սակայն, «ցանկացած հարցումով» չէ, որ երկրորդն է քաղաքական դաշտում, ինչպես պնդում է Խամոյանը։ 

Մասնավորապես, Միջազգային հանրապետական ինստիտուտի (IRI)՝ հանրային կարծիքի հետազոտության վերջին՝ 2024 թվականի սեպտեմբերին իրականացրած հրապարակման համաձայն՝ «Հայաստան» դաշինքը 4-րդն է։ 

Հարցին, թե «Ո՞ր կուսակցությանը կամ դաշինքին կտայիք Ձեր ձայնը, եթե խորհրդարանական ընտրություններն անցկացվեին հաջորդ կիրակի», հարցվածների ընդամենը 2%-ն է հիշել դաշինքին։ 

Այսպիսով, պատգամավորի պնդումը, թե «ցանկացած հարցումով «Հայաստան» դաշինքը երկրորդ քաղաքական ուժն է» չի համապատասխանում իրականությանը։ 

Նանե Մանասյան