«Զանգեզուրի միջանցքի» մասին լուրը խեղաթյուրված է. ինչպես հայկական մեդիան կուլ տվեց ադրբեջանական խայծը

Հունվարի 6-ին ադրբեջանական լրատվամիջոցները (1, 2, 3) լուրեր տարածեցին, թե Իրանի արտաքին գործերի նախարարության մամուլի խոսնակը հայտարարել է, որ իրանական պատվիրակությունը շուտով կայցելի Թուրքիա՝ այսպես կոչված «Զանգեզուրի միջանցքի» շուրջ բանակցությունների համար։ 

Ադրբեջանական լրատվամիջոցները, սակայն, սխալ են ներկայացրել Իրանի արտաքին գործերի նախարարության խոսնակ Էսմայիլ Բաղաիի խոսքերը՝ իրանական բեռնատարների համար Թուրքիայում առաջացած խնդրի մասին ասվածը վերագրելով «Զանգեզուրի միջանցքին»։

Մինչդեռ, մամուլի ասուլիսի ժամանակ Էսմայիլ Բաղաին, պատասխանելով Թուրքիայի սահմանին իրանական բեռնատարների համար ստեղծված վառելիքի խնդրի մասին հարցին, նշել է, որ ստեղծված խնդիրը ոչ թե քաղաքական է, այլ տեխնիկական:

«Մեր և Թուրքիայի ջանքերը եղել են, նկատի ունենալով բարիդրացիությունը և հաշվի առնելով, որ երկու երկրների համար կարևոր է երթուղիներով ապրանքների փոխադրման հարցը, փորձել ինչ-որ կերպ լուծել այդ խնդիրը։ Հավանաբար, շուտով մեր կողմից պատվիրակություն կմեկնի Թուրքիա՝ հարցը քննարկելու համար: Հուսով ենք, որ հարցը շուտով կլուծվի»,- լրագրողների հետ ճեպազրույցում հայտարարել է Էսմայիլ Բաղաին։ 

Նույն ճեպազրույցի ընթացքում իրանցի դիվանագետը, անդրադառնալով Հարավային Կովկասում հաղորդակցային ուղիների հնարավոր ապաշրջափակմանը, վերահաստատել է այդ հարցում Թեհրանի դիրքորոշման անփոփոխ լինելը:

Խնդրի մասին պարզաբանում է տարածել նաև իրանական «Միրանպրես» լրատվական գործակալությունը: Ըստ լրատվամիջոցի՝ ««Զանգեզուրի միջանցքի վերաբերյալ ԱԳՆ հայտարարության» մասին ադրբեջանական լրատվամիջոցներում հրապարակված լուրը «Դանեշջու» լրատվական գործակալության մեդիաքայլն էր, և արտաքին գործերի նախարարությունը Զանգեզուրի վերաբերյալ նոր դիրքորոշում չի որդեգրել»։ 

Իրանի արտաքին գործերի նախարարության մամուլի խոսնակի հայտարարությունը խեղաթյուրված ներկայացվելու մասին նշել է նաև իրանագետ Աննա Գևորգյանը: «Այսօր տեղի ունեցած մամլո ասուլիսի ժամանակ ԻԻՀ արտաքին գործերի նախարարության մամլո խոսնակի Բաղաիին հարց տվեցին՝ «Ինչպես է կարգավորվելու բեռնատարների հարցը և արդյոք դա կապված է «Զանգեզուրի դալանի» հետ (Իրանում այդպես են կոչում թուրքական ծրագիրը՝ «Զանգեզուրի միջանցք» ունենալու)։ Ի պատասխան Բաղաին ասել է՝ «ԴԱ ավելի շատ տեխնիկական հարց է, քան քաղաքական»:

Այդ նախադասության մեջ դա-ն վերաբերում է բեռնատարների խնդրին, ոչ թե Զանգեզուրի միջանցքին»,- գրել է նա Ֆեյսբուքի իր էջում։ 

Ադրբեջանական լրատվամիջոցներում տարածված խեղաթյուրված հոդվածը արտատպվել է նաև հայկական որոշ լրատվամիջոցներում (1, 2), այնուհետև նաև խմբագրվել: 

Նշենք, որ վերջերս Թուրքիան որոշում է ընդունել, ըստ որի՝ իրանական բեռնատարները պետք է վառելիքի հարկ վճարեն, որը համարժեք է սպառման հատուկ հարկի 155%-ին: Հարյուրավոր իրանական բեռնատարներ ամեն շաբաթ մուտք են գործում Թուրքիա՝ որպես հիմնական տարանցիկ երթուղի դեպի եվրոպական երկրներ:

Ի պատասխան` Իրանը ամսվա սկզբին դադարեցրել է վառելիքի մատակարարումը թուրքական բեռնատարներին:

Այսպիսով, Թեհրանի և Անկարայի միջև վառելիքային հարցի շուրջ տարաձայնությունները ադրբեջանական լրատվամիջոցները խեղաթյուրել են՝ ներկայացնելով այսպես կոչված «Զանգեզուրի միջանցքի» շուրջ բանակցություն, որն էլ իբրև խայծ հայկական որոշ լրատվամիջոցներ «կուլ են տվել»: 

Սյուզաննա Համբարձումյան