Արշակ Կարապետյանը կեղծ լուսանկար է տարածում

Հայաստանի պաշտպանության նախկին նախարար, ՀՀ վարչապետի նախկին խորհրդական Արշակ Կարապետյանը, որը վերջին շրջանում Հայաստանի քաղաքական կյանքի մասին խոսում է Ռուսաստանի տարածքից, իր ֆեյսբուքյան էջում լուսանկար է տարածել, որում երևում է, թե ՀՀ արտաքին գործերի նախարար Արարատ Միրզոյանը, իբր, ԱՄՆ պետքարտուղար Էնթոնի Բլինքենի հետ ՀՀ և ԱՄՆ միջև ռազմավարական գործընկերության մասին կանոնադրությունը ստորագրելուց հետո ՀՀ զինանշանով թղթապանակը գլխիվայր է պահում։ 

Լուսանկարին կից նա գրել է․ «Плохая примета»: 

«Փաստերի ստուգման հարթակն» ուսումնասիրել է Արարատ Միրզոյանի և Էնթոնի Բլինքենի կողմից ՀՀ և ԱՄՆ միջև ռազմավարական գործընկերության մասին կանոնադրության ստորագրմանը վերաբերող պաշտոնական լուսանկարները և տեսանյութը ու պարզել, որ Արշակ Կարապետյանի տարածած լուսանկարը կեղծ է։ 

Թե՛ ՀՀ ԱԳՆ պաշտոնական էջում տարածված պաշտոնական հաղորդագրություններին կից լուսանկարներում և թե՛ ԱՄՆ պետքարտուղարության պաշտոնական կայքի տեսանյութում պարզ երևում է, որ ՀՀ ԱԳ նախարար Արարատ Միրզոյանի ձեռքին Հայաստանի զինանշանով թղթապանակը ճիշտ դիրքով է։

Այսպիսով, ՀՀ պաշտպանության նախկին նախարար Արշակ Կարապետյանն իր ֆեյսբուքյան էջում կեղծ լուսանկար է տարածել։ Նշենք, որ Հայաստանի իրավապահ մարմիններում հարուցված քրեական գործի շրջանակներում 2024 թ․ դեկտեմբերի 30-ին Մոսկվայում Արշակ Կարապետյանին բերման էին ենթարկել, որպես խափանման միջոց էր ընտրվել երկրից բացակայելու արգելքը: Նրան մեղադրանք է ներկայացվել ՀՀ ՔՕ մի քանի հոդվածներով՝ ձեռնարկատիրական ապօրինի գործունեություն, պաշտոնեական դիրքի և պաշտոնի չարաշահում։

Սյուզաննա Համբարձումյան