Հերթական deep fake-ը Թրամփի մասնակցությամբ․ նա չի սպառնացել Պուտինին ՌԴ-ից տարածքներ բռնակցել

Սոցիալական մեդիայի հայալեզու և ռուսալեզու տիրույթներում տարածվում է Ամերիկայի Միացյալ Նահանգների նախագահ Դոնալդ Թրամփի մասնակցությամբ տեսանյութ, որում նա իբր պատմում է իր և Ռուսաստանի Դաշնության նախագահ Վլադիմիր Պուտինի վերջին հեռախոսազրույցի մասին։ 

«Ես հեռախոսազրույց եմ ունեցել նրա հետ։ Ես ասացի՝ Վլադիմի՛ր, սա (պատերազմը,-հեղ․) պետք է կանգնեցնել։ Նա համաձայնվեց, սակայն ասաց, որ ՌԴ շահերը պետք է առաջնահերթ լինեն, քանի որ նրանք սահմանադրությամբ ամրագրել են որոշ տարածքների (Ուկրաինայի արևելքում ՌԴ-ի բռնակցած տարածքներ,-հեղ․) կցումը իրենց։ Ես ասացի՝ Վլադիմի՛ր, լսի՛ր, դա անհեթեթություն է։ Ես Ջո Բայդենը չեմ։ Կա՛մ դու արդար գործարք կկնքես, կա՛մ մենք այնպես կանենք, որ ՌԴ որոշ տարածքներ կհայտնվեն Ուկրաինայի սահմանադրության մեջ։ Եվ հավատա, մարդկանց դա դուր կգա»,- ասվում է Թրամփին վերագրվող խոսքում։ 

pic.twitter.com/u90KjgNg15

— Newsfeed (@Newsfeed883920) February 9, 2025

Ավելի վաղ՝ փետրվարի 9-ին, Թրամփը New York Post-ին տված հարցազրույցում մի շարք մանրամասներ էր հայտնել իր և Պուտինի վերջին հեռախոսազրույցից։ Հրապարակման համաձայն՝ ԱՄՆ նախագահն ասել էր, որ իր կարծիքով Պուտինը մտահոգ է պատերազմում մարդկային կորուստների փաստով։ 

«Նա ցանկանում է, որ մարդիկ դադարեն զոհվել»,- ասել է Թրամփը՝ չհայտնելով  այլ մանրամասներ հեռախոսազրույցի մասին։ 

Թերթի հետ զրույցում Թրամփը գնահատականներ է տրվել ուկրաինական ճգնաժամի վերաբերյալ՝ նշելով, որ եթե 2020 թվականին ինքն ընտրվեր ԱՄՆ նախագահ, պատերազմ չէր լինի։ 

«Փաստերի ստուգման հարթակը» պարզել է, որ X սոցիալական մեդիայում տարածված՝ խնդրո առարկա տեսանյութը deep fake է և գեներացվել է արհեստական բանականության միջոցով․ մասնավորապես, FIP.am-ը տեսանյութը ներբեռնել է արհեստական բանականության միջոցով ստեղծված նյութերի հայտնաբերման համար նախատեսված Attestiv հարթակ և պարզել, որ այն կեղծ է: 

Հարթակը վերլուծել է տեսանյութում Թրամփի շուրթերի, դիմագծերի շարժը, ձայնը ու եզրահանգել, որ այն, ամենայն հավանականությամբ, կեղծ է։ 

Ավելի վաղ էլ «Ամերիկայի ձայնը» Թրամփի մասնակցությամբ մեկ այլ deep fake էր բացահայտել․ ըստ հրապարակման, հունվարի 23-ին այն տարածել էր ուկրաինական BAZA տելեգրամյան ալիքը՝ պնդելով, թե Թրամփը Լիբիայի ու Իրաքի նախկին նախագահներ Մուամմար Քադաֆիի և Սադամ Հուսեյնի ճակատագրով էր սպառնացել Պուտինին։ 

Այսպիսով, Ուկրաինայում պատերազմը չկանգնեցնելու դիմաց ՌԴ-ից տարածքներ բռնակցելու մասին Թրամփին վերագրվող հայտարարությունները կեղծ են, իսկ տեսանյութը, որում ԱՄՆ նախագահը իբրև թե անում է վերոհիշյալ հայտարարությունները, գեներացված է ԱԲ-ի միջոցով։ 

Նանե Մանասյան