ՓԱՍՏԱՉԱՓ
Խոշորացույց
Թիվ-թվանք
Տեսանյութեր
հյ
ру
en
Հայաստանի Հանրապետության պաշտպանության նախարար Սուրեն Պապիկյանն Ազգային ժողովում 2023 թվականի նոյեմբերի 15-ին կառավարության հետ հարցուպատասխանի ընթացքում վստահություն էր հայտնել, որ 2024 թվականին հասցնելու են ՀՀ զինված ուժերի նոր համազգեստի փոփոխությունը։
Ի պատասխան ԱԺ «Քաղաքացիական պայմանագիր» խմբակցության պատգամավոր Արմեն Խաչատրյանի հարցադրման, թե ո՞ւր է հասել համազգեստի բարեփոխման գործընթացը, Պապիկյանը նշել էր․ «Այո, մենք այս տարի (2023 թ․-հեղ․) նախաձեռնել ենք հագուստի փոփոխություն․․․ բաց մրցույթ ենք հայտարարել՝ նպատակ ունենալով ներգրավել Հայաստանում բոլոր մասնագետներին, որոնք կարող են ներկայացնել իրենց պատկերացումները․․․։ Արդյունքում եղել է այն, որ մասնակցել են հայկական մի շարք ընկերություններ, որակավորման առաջին փուլն անցել է, սակայն երկրոդ փուլի համար միայն մի ուղղության մի զորատեսակի համար են հայտ ներկայացրել, մնացածի մասով ցավոք մասնակիցներ չենք ունեցել։ Հիմա մենք աշխատում ենք մեր միջազգային գործընկերների հետ։ Առաջիկա օրերին կստանանաք առաջարկներ… կադատպտացնենք մեր պատկերացումներին և դրա արդյունքում մրցույթ կհայտարարենք ձեռքբերման համար և 2024 թվականին․․․»։
Խաչատրյանը, արձագանքելով, ճշտում էր արել, թե «մենք փաստորեն ստացանք վստահություն, որ Ձեր (դիմում է Պապիկյանին-հեղ․) կանխատեսումով, 2024 թվականին մեր բանակը ունենալու է ձևի և բովանդակութփյան մեջ նոր համազգեստ»։
Ի պատասխան, Պապիկյանը նշել է․ «Մենք ամեն ինչ անում ենք այդ ուղղությամբ, և վստահ եմ, որ դա հասցնելու ենք»։
Ի հեճուկս, Պապիկյանի վստահեցումների՝ հայկական բանակը 2024 թվականին այդպես էլ չունեցավ նոր համազգեստ։ «Փաստերի ստուգման հարթակը» Պաշտպանության նախարարությունից փորձել է ճշտել՝ ինչո՞ւ է ձգձգվում համազգեստի փոփոխության գործընթացը։
Նախարարությունից հայտնել են, թե պաշտպանության նախարարը թե՛ ԱԺ քառօրյա նիստերին և թե՛ ԱԺ պաշտպանության և անվտանգության հարցերի մշտական հանձնաժողովում ներկայացրել է համազգեստի ձեռքբերման վերաբերյալ տեղեկություն։
«Այս պահի դրությամբ լրացուցիչ տեղեկատվություն տրամադրել չենք կարող»,- ասվում է հարցման պատասխանում։
Հիշեցնենք, որ ՀՀ պաշտպանության նախարարությունը համազգեստի փոփոխության մրցույթ էր հայտարարել 2 տարի առաջ՝ 2023 թ․ փետրվարին։
Ըստ հայտարարության՝ «նախատեսվում է փոփոխել ԶՈՒ անձնակազմի հանդերձանքը, այդ թվում՝ դաշտային, ամենօրյա, գրասենյակային, կուրսանտական և համազգեստի այլ տեսակները, ինչով պայմանավորված ՀՀ պաշտպանության նախարարությունը նախատեսում է ձեռք բերել հագուստի (համազգեստի) դիզայնի մշակման խորհրդատվական ծառայություններ»:
2023 թ․ փետրվարին այն ժամանակ դեռևս ԶՈՒ թիկունքային ապահովման վարչության պետ Արամ Պողոսյանը, «Զինուժ» հաղորդման փոխանցմամբ, ևս նշել էր, որ ձեռնարկվում են բոլոր միջոցները, որ 2024 թվականին ՀՀ ԶՈՒ-ն նոր համազգեստ ունենա։
Այսպիսով, չնայած նախարար Պապիկյանի և ՀՀ ԶՈՒ վարչության պետի հավաստիացումներին, 2024 թվականին հայկական բանակը նոր համազգեստ չունեցավ։ Իսկ նախարարությունը որևէ լրացուցիչ տեղեկություն չի տրամադրել գործընթացի վերաբերյալ։
Նանե Մանասյան
