Կիևում 12 խաղաղ բնակչի կյանք խլած հարվածը Կրեմլում ներկայացնում են որպես ռազմական օբյեկտների թիրախավորում

Ապրիլի 24-ի գիշերը Ռուսաստանի զինված ուժերը հրթիռային հարձակում են գործել Ուկրաինայի մայրաքաղաք Կիևի վրա, ինչի հետևանքով, ըստ պաշտոնական աղբյուրների, զոհվել է առնվազն 12 քաղաքացիական անձ, իսկ մոտ 90-ը վիրավորվել են։

Ռուսական բանակը օգտագործել է Հյուսիսային Կորեայում արտադրված բալիստիկ հրթիռներ և տասնյակ անօդաչու թռչող սարքեր, որոնցից շատերը թիրախավորել են Կիևի մի քանի թաղամասեր․ հարձակման հետևանքով մեծապես վնասվել են բնակելի շենքեր և քաղաքացիական ենթակառուցվածքներ։ 

Քարոզչամեքենան պնդում է՝ խոցել են ռազմական թիրախներ

Ռուսաստանի Առաջին ալիքը, անդրադառնալով լայնածավալ օդային հարձակմանը, բնակելի թաղամասերի ու շենքերի խոցումը ներկայացրել է որպես բացառապես ռազմական ենթակառուցվածքների վրա հարձակում։ 

«Զանգվածային հարձակում Ուկրաինայի ռազմական ենթակառուցվածքի վրա այս գիշեր։ Բազմաթիվ հզոր պայթյուններ են որոտացել Կիևում»,- կարճատև հաղորդագրությամբ ներկայացրել է մեկնաբանը՝ շրջանցելով տասնյակ զոհերի ու վիրավորների մասին փաստը։  

Միևնույն ժամանակ, ՌԴ նախագահի մամուլի քարտուղար Դմիտրի Պեսկովը, մեկնաբանելով հարձակումը, պնդել է, թե ռուսական զինված ուժերը շարունակում են խոցել բացառապես ռազմական և «գրեթե ռազմական» ենթակառուցվածքները։ 

Մինչդեռ համացանցում և միջազգային մամուլում կան բազմաթիվ կադրերը, որոնք փաստում են խոցված բնակելի շենքերի և տասնյակ զոհվածների ու վիրավորների մասին։ 

Ռուսաստանի կողմից հարձակումները նույնիսկ տխրեցրել էին ԱՄՆ նախագահ Դոնալդ Թրամփին, և նա սոցցանցի իր էջում հայտնել էր իր դժգոհությունը։

Նա ուղիղ կոչ էր արել Պուտինին՝ պահանջելով կանգ առնել։ ԱՄՆ նախագահ ընտրվելուց հետո սա առաջին անգամն է, որ Թրամփը քննադատում է Պուտինին և անձամբ նրան զսպվածության կոչ անում։

Այսպես, ռուսաստանյան քարոզչությունը շարունակում է ներկայացնել քաղաքացիական ենթակառուցվածքների ու խաղաղ բնակիչների վրա հարձակումները որպես ռազմական օբյեկտների խոցում։

Գլխավոր լուսանկարը՝ AFP

Նանե Մանասյան