Ոստիկանության ՕԿԿ պետը ներգրավվել է որպես մեղադրյալ

Հայաստանի Հանրապետության ներքին գործերի նախարարության ոստիկանության օպերատիվ կառավարման կենտրոնի պետ, ոստիկանության գնդապետ Արայիկ Առաքելյանն այս օրերին ներգրավվել է որպես մեղադրյալ Հակակոռուպցիոն կոմիտեում քննվող քրեական վարույթի շրջանակում։ 

«Փաստերի ստուգման հարթակը» Արայիկ Առաքելյանի ծառայողական լիազորությունները չարաշահելու մասին տեղեկություն էր ստացել, որը ճշտելու համար հարցմամբ դիմել էինք Հակակոռուպցիոն կոմիտե։ 

«Ի պատասխան ձեր հարցման, տեղեկացնում ենք, որ նշված պաշտոնատար անձը ՀՀ հակակոռուպցիոն կոմիտեում քննվող քրեական վարույթի շրջանակում ունի մեղադրյալի դատավարական կարգավիճակ»,- պատասխանել են կոմիտեից։

Արայիկ Առաքելյանին մեղադրանք է ներկայացվել ՀՀ քրեական օրենսգրքի 441-րդ հոդվածի 1-ին մասի հատկանիշներով: 

Այս հոդվածը սահմանում է հետևյալը․ «Պաշտոնատար անձի կողմից իր իշխանական կամ ծառայողական լիազորությունները կամ դրանցով պայմանավորված ազդեցությունն ի վնաս պետական կամ ծառայողական շահերի օգտագործելը կամ իր ծառայողական պարտականությունը չկատարելը կամ ոչ պատշաճ կատարելը կամ այնպիսի արարք կատարելը, որը չի բխում իր լիազորություններից կամ դուրս է իր լիազորությունների շրջանակից, որն էական վնաս է պատճառել անձի կամ կազմակերպության իրավունքներին, ազատություններին կամ օրինական շահերին կամ հասարակության կամ պետության օրինական շահերին»։ 

ՀՀ քրեական օրենսգիրքն այս արարքի համար որպես պատիժ նախատեսում է տուգանք` քսանապատիկից քառասնապատիկի չափով, կամ որոշակի պաշտոններ զբաղեցնելու իրավունքից զրկում` երեքից յոթ տարի ժամկետով։ Նաև նախատեսվում է անազատության ձևով պատիժ, բայց տարբեր ժամկետներով․ ամենակարճը 1-2 ամիսն է։ 

Արայիկ Առաքելյանի նկատմամբ որպես խափանման միջոց է կիրառվել բացակայելու արգելքը:

ՀՀ հակակոռուպցիոն կոմիտեից քրեական վարույթի մանրամասների մասին տեղեկություն չեն տրամադրել, թեպետ FIP.am-ը ՀԿԿ-ին ուղղված իր հարցադրումներում քրեական վարույթի բովանդակության մասին նշումներ էր արել։

Մասնավորապես, մեզ հայտնի է, որ Արայիկ Առաքելյանի ղեկավարման ներքո որպես աշխատողներ գրանցված են եղել մարդիկ, որոնք չեն ներկայացել աշխատանքի։ Նրանցից մեկը նույնիսկ (մեզ հայտնի տվյալը միայն մեկ աշխատողի մասով է-խմբ․), չներկայանալով աշխատանքի, ստացել է աշխատավարձ։ 

Այսպիսով, ծառայողական լիազորությունները չարաշահելու համար մեղադրվող ոստիկանության բարձրաստիճան պաշտոնյան շարունակում է պաշտոնավարել, ինչը կարող է կասկածի տակ դնել քննության օբյեկտիվությունը։

Այսօր՝ ապրիլի 30-ին, այս մասին հրապարակում պատրաստելու պահին մեր ունեցած տեղեկություններով՝ Արայիկ Առաքելյանը դեռ շարունակում էր պաշտոնավարել, սակայն հրապարակման թողարկումից հետո Հակակոռուպցիոն կոմիտեից FIP.am-ին տեղեկացրին, որ քննությունը վարող քննիչի միջնորդությամբ Արայիկ Առաքելյանի պաշտոնավարումը կասեցված է։

Հասմիկ Համբարձումյան