«Փաստերի ստուգման հարթակը» ներկայացնում է 44-օրյա պատերազմում զոհված զինծառայողների ցանկը

2020 թվականի 44-օրյա պատերազմից հետո մինչև վերջերս հանրային դաշտում պարբերաբար լայն քննարկումների թեմա է դառնում հարցը՝ ինչո՞ւ չեն հրապարակվում 44-օրյա պատերազմում զոհված զինծառայողների անունները։  

Նոյեմբերի 28-ին ԱԺ նախագահ Ալեն Սիմոնյանը, պատասխանելով լրագրողների հարցերին, հայտարարել էր, թե պատերազմի զոհերի անունները չեն հրապարակվում, քանի որ դա անձնական տվյալ է։ 

«Փաստերի ստուգման հարթակը» անդրադարձել էր ԱԺ նախագահի այդ հայտարարությանը, և հիմնվելով հայաստանյան օրենսդրության վրա եզրակացրել, որ Ալեն Սիմոնյանի հայտարարությունը  չի բխում գործող օրենսդրությունից և հակասում է ինչպես օրենքին, այնպես էլ նախադեպերին։

Այնուհետև FIP.am-ը հարցումներով դիմել էր Քննչական կոմիտե և ՀՀ պաշտպանության նախարարություն՝ խնդրելով տրամադրել զոհերի անվանացանկը։

ՔԿ-ն դարձյալ հղում էր արել «Անձնական տվյալների պաշտպանության մասին» օրենքին և չէր տրամադրել որևէ տվյալ, սակայն Պաշտպանության նախարարությունից նույն հարցմանն ի պատասխան նշել են, որ ՊՆ զինծառայողների սոցիալական պաշտպանության վարչությունում հաշվառված են 44-օրյա պատերազմի ընթացքում զոհված, անհետ կորած և դատական կարգով մահացած ճանաչված զինծառայողները, ինչպես նաև կամավորագրված անձինք։ 

«Այս անձանց ցանկին հնարավոր է ծանոթանալ Զինապահ — զինծառայողների ապահովագրության ազգային հիմնադրամի կայքում»,- նշել են ՊՆ-ից։

Հաշվի առնելով հանրային հետաքրքրությունը և պարբերաբար բարձրացվող հարցը՝ ինչո՞ւ չեն հրապարակվում 44-օրյա զոհերի անունները, «Փաստերի ստուգման հարթակը» «Զինապահ» հիմնադրամի կայքից առանձնացրել ու ստեղծել է 44-օրյա պատերազմում զոհված զինծառայողների անունների բազա։ 

Կայքում նշված զոհերի թիվը 3246 է։ Պաշտոնապես հրապարակված զոհերի թիվը, որը ներառում է նաև քաղաքացիական անձանց՝ 3833 է։

Նկատենք՝ կայքում նշված է, որ հրապարակված են «Զինապահի» շահառու այն զոհված զինծառայողների լուսանկարները և հակիրճ պատմությունները, ում հարազատները տվել են իրենց համաձայնությունը հրապարակման համար։