Կրեմլի Storm 1516-ի բոտերի ցանցը կեղծիք է տարածում ՀՀ-ում քվեարկության մասին

Ապատեղեկատվական արշավներ իրականացնող Storm 1516-ի բոտերի ցանցը, որը համակարգվում է Կրեմլի կողմից, X-ի իր տասնյակ հաշիվների միջոցով տարածել է տեսանյութ, որում ոչ հոդաբաշխ հայերենով ու առոգանությամբ խոսվում է Հայաստանում քվեարկության օրվա վերաբերյալ։ 

Հաշիվները, մասնավորապես, պնդել են, թե կառավարող «Քաղաքացիական պայմանագիր» կուսակցության ներկայացուցիչները քվեատուփերից հանում և ոչնչացնում են իրենց մրցակիցների քվեաթերթիկները։ 

Տեսանյութում երևում է, որ մի անձ քվեախցիկում ծրարից հանում ու մկրատով կտրում է 3 և 17 համարների քվեաթերթիկները՝ փնովելով այդ համարներով ընտրություններին մասնակցող ուժերի օգտին քվեարկածներին։ 

Հատկանշական է, որ ծրարը, որի միջից հանում են քվեաթերթիկը սպիտակ է, մինչդեռ այս ընտրություններոմ օգտագործվում են բացառապես շագանակագույն ծրարներ։ 

Սրան զուգահեռ, համաձայն ՀՀ ընտրական օրենսգքրի հոդված 59-ի՝

ինքնասոսնձվող դրոշմանիշը պաշտպանիչ շերտերով տպարանային եղանակով պատրաստված դրոշմանիշ է, որի վրա նշված են ընտրության անվանման հապավումը, քվեարկության ամսաթիվը և ընտրական տեղամասի համարը: Ինքնասոսնձվող դրոշմանիշը ենթակա է հատուկ հաշվառման:

Մինչդեռ տեսանյութում երևացող դրոշմանիշի վրա չկան տվյալներ․ երևացող դրոշմանիշերի գույնն է նաև այլ՝ մոխրագույն՝ մանուշակագույնի փոխարեն։ 

Նշված միջադեպն արձանագրված չէ ՀՀ բոլոր ընտրատեղամասերից հեռարձակվող ուղիղ եթերներում, չկան նաև ահազանգեր դիտորդական կազմակերպությունների ու վստահված անձանց կողմից։ 

Այսպիսով, Կրեմլի բոտերի ցանցը տարածել է կեղծիք ՀՀ ընտրությունների վերաբերյալ՝ պնդելով, որ կառավարող ուժը դիմում է ընտրակեղծարարության, ինչը հերքվում է տեսանյութում առկա տարբեր բացթողումների միջոցով։ 

Նանե Մանասյան