Պահանջում ենք հերքում ArmDaily.am կայքից

 Շուրջ մեկ ամիս առաջ FIP.am-ն անդրադարձել էր ArmDaily.am կայքում տեղ գտած մի հրապարակման, որը փաստացի ապատեղեկատվություն էր։ Ազգային ժողովի նախագահ Արարատ Միրզոյանի օգնական Շուշանիկ Թևանյանի այցը Գերմանիա լրատվամիջոցի կողմից ներկայացվել էր որպես հավելյալ բեռ ՀՀ պետական բյուջեի վրա։ Մինչդեռ պարզվել էր, որ ԱԺ նախագահի օգնականի համար պետական միջոցներից որևէ հատկացում չէր արվել։ Վերջինս ներառված չէր անգամ Գերմանիայում գտնվող ԱԺ պատվիրակության կազմում։

Ապրիլի 25-ին ArmDaily-ն կրկին անդրադարձել էր ԱԺ պատվիրակության՝ Գերմանիա կատարած այցին՝ ներկայացնելով, թե որքան գումար է հատկացվել պետական միջոցներից հայկական կողմի այցելությունը կազմակերպելու համար։ Հրապարակման մեջ ArmDaily-ն խեղաթյուրել է FIP.am-ի հրապարակման բովանդակությունը՝ նշելով, թե «Փաստերի ստուգման հարթակը» փորձել է համոզել հանրությանը, որ նորմալ է պետբյուջեից ծախսված գումարները թաքցնելը։ Իրականում, ինչպես և պարզ է դառնում ArmDaily-ի վերջին հրապարակումից, մեղադրանքը՝ Շուշանիկ Թևանյանին որպես ՀՀ պետական բյուջեի վրա բեռ ներկայացնելը, եղել է ապատեղեկատվություն, ինչին էլ հենց անդրադարձել էր FIP.am-ը։

Ակնհայտ է, որ պնդումները, թե «Փաստերի ստուգման հարթակը» պաշտպանում կամ արդարացնում է պետական բյուջեի գումարները ծախսողին, սխալ են։ ArmDaily-ի կողմից նման որակումը, փաստացի, հերթական ապացույցն է, որ լրատվամիջոցը խեղաթյուրում է փաստերը, դիտավորյալ կամ գուցե առանց դիտավորության վնասում «Փաստերի ստուգման հարթակի» հեղինակությունը։

Պահանջում ենք ArmDaily կայքին հանդես գալ հերքմամբ և ներողություն խնդրել ոչ գործընկերային պահվածքի, փաստերի խեղաթյուրման համար։

 

 

FIP.am-ի խմբագրական թիմ