Ժիրայր Սեֆիլյանի զենքերով ավտովթարը չի՞ եղել

Դեռևս ՊՊԾ գնդի դեպքերից առաջ, 2016 թվականի հունիսի 20-ին ՀՀ Քննչական կոմիտեն տարածել էր հաղորդագրություն, որի համաձայն «Մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և պահելը կազմակերպելու կասկածանքով 2016թ. հունիսի 20-ին ձերբակալվել է Ժիրայր Սեֆիլյանը»:

Մասնավորապես, ըստ ՔԿ հաղորդագրության, «2016 թ. մայիսի 20-ին Երևան քաղաքի Ծիծեռնակաբերդի խճուղու սկզբնամասում տեղի ունեցած ճանապարհատրանսպորտային պատահարի դեպքի վայր ժամանած ոստիկանության ծառայողները պատահարի մասնակցի ավտոմեքենայից հայտնաբերել են ԱԿ-74 տեսակի երկու ինքնաձիգ՝ 120 փամփուշտներով»:

Մենք փորձեցինք պարզել, թե ու՞մ հետ է բախվել Ժիրայր Սեֆիլյանի մեքենան: Այդ նպատակով հարցումներ ուղարկեցինք ՀՀ ոստիկանության պետին և ստացանք հետաքրիր պատասխան:

Մասնավորապես, մեր հարցումներին պատասխանեց Ոստիկանության «Ճանապարհային ոստիկանություն» ծառայության պետը, ով հայտնեց, որ հունիսի 20-ին Երևան քաղաքի Ծիծեռնակաբերդի խճուղում ՃՈ կողմից ավտովթար չի գրանցվել (համապատասխան մատյանում գրառումներ չկան):

Դժվար է ասել, թե երկու իրավապահ մարմիններից (Քննչական կոմիտե և Ոստիկանություն) ո՞ր մեկի տրամդրած տեղեկությունն է համապատասխանում իրականությանը, բայց հակասությունն ակներև է: Կամ ոստիկանությունն է սխալ տեղեկություն տրամադրում (իրականում վթարը եղել է, բայց դրա մանրամասները փորձում են հանրությանը չներկայացնել), կամ Քննչական կոմիտեն է ակնհայտ սուտ տարածում (իրականում վթար չի եղել և Ժիրայր Սեֆիլյանի ձերբակալության պատմությունը սուտ է):

Հ.Գ. Ու թեև ակնհայտ է, որ հաղորդագրության մեջ որպես ճանապարհային պատահարի օր  «մայիսի 20»-ի տեղը պետք է նշվեր «հունիսի 20» (տեխնիկական վրիպակ է), սակայն մենք ճանապարհային ոստիկանությունից ճիշտ նույն պատասխանը ստացանք այն մասին, որ մայիսի 20-ին Ծիծեռնակաբերդի խճուղում Ճանապարհային ոստիկանության կողմից վթար չի արձանագրվել: