Ծառուկյանը չգիտի, թե ով է ընդունում օրենքները

Հայաստանում նախընտրական քարոզարշավը գնալով ավելի է թեժանում` շատ հաճախ ստանալով զավեշտալի դրսևորումներ, օրինակ քաղաքական այս կամ այն գործիչի ուշագրավ հայտարարությունների տեսքով:

Այդպիսին են Ապարանում Գագիկ Ծառուկյանի նույնանուն դաշինքի կազմակերպած միջոցառման ժամանակ հնչեցրած պնդումներն Ընտրական օրենսգրքի ու դրա հեղինակի մասին:

Մասնավորապես, Գագիկ Ծառուկյանը վրդովվել էր Ընտրական օրենսգրքի այն դրույթով, համաձայն որի նախընտրական քարոզարշավի շրջանում նվիրատվությունները, նվիրատվությունների մասին խոստումներն արգելվում են: Նման խախտումներ ՀՀ կենտրոնական ընտրական հանձնաժողովը, ի դեմս կառույցի ղեկավար Տիգրան Մուկուչյանի, նկատել էր Ծառուկյանի գործունեությունում, մարզային հանդիպումների ժամանակ:

Ծառուկյանը Ապարանում բողոքում էր, որ Տիգրան Մուկուչյանն արգելում է իրեն լավություն անել, մարդկանց օգնել կամ նույնիսկ օգնության խոստումներ տալ: «Պարոն Մուկուչյանն էլ օրենք ա հանել, էն Կենտրոնական հանձնաժողովի նախագան, մարդկանց խոստում էլ չտաս»,- մասնավորապես, դժգոհում էր նա՝ պնդելով, փաստացի, որ Ընտրական օրենսգիրքը հեղինակել է ոչ այլ ոք, քան հենց Մուկուչյանը:

Սրանով, սակայն, ԱԺ գործող պատգամավոր Գագիկ Ծառուկյանը խոստովանում է, որ տեղյակ չէ բարձրագույն օրենսդիր մարմնի գործունեությունից, տեղյակ չէ Հայաստանում օրենքների ընդունման կարգից, ավելին՝ ընդհանրապես տեղյակ չէ, որ ԸՕ-ն ընդունել է ոչ թե Տիգրան Մուկուչյանը, այլ նաև հենց իր ղեկավարած կուսակցության պատգամավորները, իր դաշինքի անդամները: էլ ավելին՝ եթե պատգամավոր Գագիկ Ծառուկյանը ժամանակ առ ժամանակ այցելեր ԱԺ նիստերին, միգուցե և հասցներ ժամանակին սեղմել-չսեղմել համապատասխան կոճակները, որպեսզի հետո կարողանար հանգիստ խղճով «ընտրաօգնություններ» ու «ընտրախոստումներ» բաշխել:

Տեսանյութը՝ http://www.azatutyun.am/