ՓԱՍՏԱՉԱՓ
Խոշորացույց
Թիվ-թվանք
Տեսանյութեր
հյ
ру
en
Ռուսական քարոզչության հիմնական նպատակներից մեկը եվրաինտեգրման գործընթացի ու դրա արդյունքների վերաբերյալ հանրության մոտ թյուր կարծիք ձևավորելն է, համաձայն որի եվրաինտեգրման ճանապարհն ընտրած երկրներն ուղղակի «կոտորվում են» առանց ռուսական գազի և օր օրի խորտակվում ճգնաժամի ճահճում:
Համենայն դեպս, 2017 թվականի ապրիլի 12-ի Gazeta.ru-ի հրապարակած «Վրաստանը կբավարարվի առանց «Գազպրոմի»» (Грузия обойдется без «Газпрома») նյութը զարդարված է 2003 թվականին արված լուսանկարով, որում պատկերված են բնակարանների ջեռուցման համար փայտ գնող մարդիկ, իսկ հետևի ֆոնում փայլատակում է «Իվերիա» հյուրանոցը պոստապոկալիպտիկ աշխարհ հիշեցնող վիճակում:
Թեման թերևս այդքան ուշագրավ չլիներ, եթե այս լուսանկարը տեղադրված չլիներ որպես գլխավոր նկար, որը տարածվում է նյութի հետ սոցցանցերում, իսկ հենց նյութի մեջ ահռելի տարածք է զբաղեցնում, այնինչ լուսանկարի մասին տեղեկությունները՝ շատ մանր տառաչափով տեղադրված են լուսանկարի ներքևում բարակ տողով:
Թեման էլ ավելի ուշագրավ է դառնում նրանով, որ լուսանկարն արվել է մի վայրում, որը հիմա կոչվում է Վարդերի հեղափոխության հրապարակ և որտեղ արդեն շատ վաղուց ոչ ոք փայտ չի վաճառում, այլ գործում է լավ զարգացած էներգետիկ համակարգ, իսկ ընդհանուր տեսարանը զարդարում է «Ռեդիսոն» ժամանակակից հյուրանոցը՝ արդեն ֆուտուրիստիկ աշխարհ հիշեցնելով:
Իհարկե, ռուսական խմբագրությունը կարող էր իր նյութի համար ընտրել ժամանակակից նկար և այդ դեպքում նյութի տարածման ու ընթերցման ընթացքում բազմաթիվ մարդիկ կտեսնեին, որ Վրաստանը, վարելով անկախ էներգետիկ քաղաքականություն՝ բավականին բարեկեցիկ երկիր է, բայց ռուսական խմբագրությունում նախընտրել են ճիշտ հակառակը:
Ուստի, կարելի է արձանագրել, որ քարոզչական նպատակներով ռուսական ԶԼՄ-ները կարող են օգտագործել վիզուալ մանիպուլյացիաներ՝ խեղելով բուն տեղեկատվության իմաստը:
