Տարոն Մարգարյանը կրկնում է չիրականացված խոստումը

2013 թվականի Երևանի ավագանու ընտրություններին Հանրապետական կուսակցությունը և իր քաղաքապետի թեկնածու Տարոն Մարգարյանը ներկայացրեցին «Ավելի լավ Երևան» կոչվող ծրագիրը՝ ամրագրելով այնտեղ բազմաթիվ խոստումներ: Դրանցից շատերը սակայն չեն իրագործվել:

Այդպիսի խոստումներից մեկը Շիրակի փողոց — Արգավանդի ճանապարհային հանգույցը միացնող նոր ճանապարհի կառուցումն էր: Սակայն այս ճանապարհն իրականում մեկ այլ մեծ նախագծի՝ Հյուսիս-Հարավ ավտոմայրուղու մաս է կազմում և կառուցումն իրականացվում է Ասիական զարգացման բանկի աջակցությամբ՝ «Քաղաքային կայուն զարգացման ներդրումային» ծրագրի շրջանակներում: Այսինքն, անկախ Տարոն Մարգարյանի ներկայացրած ծրագրերի այն կառուցվելու է, որպեսզի Հյուսիս-Հարավը շրջանցի Երևանը։

Հատկանշական է նաև, որ 5 տարվա վաղեմության այս ծրագիրն այսօր էլ է խոստում և իր տեղն է գտել արդեն 2017 թվականի նախընտրական ծրագրում:

2016 թվականին Տարոն Մարգարյանի և «Սերենիսիմա Կոնստրուցիոնի» կազմակերպության նախագահ Ալբերտո Բրենտեգանիի կողմից կարծես տրվեց ճանապարհի շինարարության մեկնարկը: Այդ արարողությունը լայնորեն լուսաբանվեց և տարածվեց համացանցով մեկ:

Ծրագրի համաձայն, նոր ճանապարհը պետք է ունենար 4-6 երթևեկելի գոտի՝ միջինը 24 մետր լայնությամբ և շուրջ 1,5 կմ երկարությամբ, ինչպես նաև Հրազդան գետի վրա պետք է կառուցվեր 252 մ երկարությամբ կամուրջ:

Այսօր, սակայն ճանապարհի կառուցումը դադարեցված է, տարածքում չկան ո՛չ շինարարական տեխնիկա, ո՛չ էլ աշխատողներ: