ՓԱՍՏԱՉԱՓ
Խոշորացույց
Թիվ-թվանք
Տեսանյութեր
հյ
en
ру
Երևանի ավագանու 2013 թվականի ընտրությանը Հանրապետական կուսակցությունը և վերջինիս քաղաքապետի թեկնածու Տարոն Մարգարյանը հանդես եկան «Ավելի լավ Երևան» ծրագրով: Այն բաղկացած էր 9 մասից, որոնցում մանրամասն նշված էին 2013-2017 թվականներին կատարվող աշխատանքները: Այսօր, սակայն կարող ենք փաստել, որ խոստումների մի մասն է միայն կատարվել՝ չիրագործված թողնելով առավել կարևոր ծրագրերը:
Հին Երևան
Ամենից մեծ հնչեղություն ունեցող, սակայն չիրականացած ծրագիրը թերևս «Հին Երևան» նախագիծն է: Այս տարիները ընթացքում Երևանում ապամոնտաժվեցին բազմաթիվ պատմական և մշակութային արժեք ներկայացնող շենքեր, որոնք քաղաքապետարանի հավաստիացումներով իրենց տեղը պետք է գտնեին երևանյան նոր՝ «Հին Երևան» կոչվող թաղամասում: Թաղամասի կառուցման ժամկետները, սակայն ամեն տարի երկարաձգվում են:
Տրանսպորտ
Այս տարների ընթացքում երևանցիների համար թերևս ամենացավոտը հասարակական տրանսպորտի խնդիրն է: Տարոն Մարգարյանը խնդիրն առաջարկել է լուծել միջին և մեծ ուղևորատարողությամբ ավտոբուսների քանակի ավելացմամբ, սակայն խնդիրը տարեց տարի ավելի է խորացել: Ավելին, քաղաքապետարանից ստացված գրության համաձայն՝ 2013 թվականին Երևանում գործել է 700 ավտոբուս և 1730 միկրոավտոբուս, այսօր այդ թիվը կազմում է համապատասխան 668 և 1440: Այլ կերպ ասած, շարժակազմերը թիվը ոչ թե աճել է, ինչպես խոստացել էր Տարոն Մարգարյանը, այլ նվազել 322 միավոր մեքենայով: Տրոլեյբուսի պարկի թարմացման վերաբերյալ խոստման մասին ավելորդ է անգամ խոսել, քանի որ դրա քանակը այս տարների ընթացքում չի փոխվել՝ մնալով 78 միավոր:
Աղբի վերամշակման գործարան
«Մաքուր և կանաչ Երևան» ծրագրի շրջանակներում Տարոն Մարգարյանը խոստացել էր աղբի տեսակավորման, վերամշակման ձեռնարկություն հիմնել: Այս ծրագիրը իրականացնել չկարողացած Մարգարյանը, սակայն չի հանձնվել՝ խոստանալով այն իրականացնել արդեն 2017-2022 թթ. ընթացքում: Ավելին, այսօր Տարոն Մարգարյանը երևանցիներին խոստանում է ևս մեկ աղբավայր ստեղծել: Առանց այդ էլ էկոլոգիական ծանր վիճակում գտնվող Երևանում նոր աղբավայրի կառուցման պատճառը հավանաբար աղբի մեծ քանակն է և դրա վերամշակող հիմնարկի բացակայությունը։
Հրանտ Մաթևոսյանի անվան թանգարան
Չիրականացած ծրագրերից է նաև Հրանտ Մաթևոսյանի անվան թանգարանի հիմնումը: 2015 թվականին կառավարությունը հայտարարեց, որ 50 մլն դրամ կհատկացնի թանգարանի շինարարության մեկնարկի համար, սակայն քաղաքաշինության նախարար Նարեկ Սարգսյանը հայտարարեց, որ թանգարանի կառուցման ծախսերը կազմում են մոտ 3 անգամ շատ: Արդյունքում, Հրանտ Մաթևոսյանի թանգարանը կառուցված չէ:
Ժամանակակից արվեստի թանգարան
Հաջորդ թանգարանը, որը Տարոն Մարգարյանը խոստացել էր երևանցիներին Ժամանակակից արվեստի թանգարանի նոր շենքն է: 45 տարվա այս շենքը այսօր գտնվում է անմխիթար վիճակում: Իսկ, ինչպես մեզ հետ զրույցում նշեց թանգարանի փոխտնօրեն Զառա Այրումյանը՝ իրենք տարիներով լսել են բազմաթիվ պետական այրերի խոստումներ, սակայն որևէ գործնական քայլ առ այսօր կատարված չէ:
Ռաֆայել Աֆրիկյան
