«Հայկական ժամը» հին տեղեկությունները ներկայացնում է որպես նոր՝ խեղաթյուրելով փաստերը

«Հայկական ժամ» (hzham.am) լրատվական կայքում հունվարի 11-ին հրապարակում է տարածվել, որում ասվում է, թե դեկտեմբերի 17-ին ՄԱԿ-ում միգրացիայի վերաբերյալ որոշում է ընդունվել, որով այսուհետ կազմակերպությունն է որոշելու, թե որ երկիրը որքան ներգաղթյալներ պետք է ընդունի: 

«Այս փաստաթղթի ամեն նախադասության տակ անպայման ՇԵՇՏՎԱԾ է, որ ստորագրող երկիրը ԽՍՏԱԳՈւՅՆՍ ՊԱՐՏԱՎՈՐՎԱԾ է ու ՎԵՐԱՆԱՅՄԱՆ ԻՐԱՎՈւՆՔ ՉՈւՆԻ… Հայաստանը կողմ է քվեարկել: […] Ներգաղթյալները բերվում են այն երկրներից, որից կորոշի ՄԱԿ-ը»,- գրված է նյութում։

Լուրը տարածվել է 4news.am կայքում և սոցիալական մեդիա հարթակներում: 

Լրատվականը, սակայն, որպես նորություն է ներկայացրել նախկինում տեղի ունեցածը և խեղաթյուրել փաստերը: Հաշվի առնելով այս թեմայի պարբերաբար շահարկումները՝ «Փաստերի ստուգման հարթակն» ուսումնասիրել է ՄԱԿ-ի այս որոշումն ու լրատվական կայքում առկա տվյալների իսկությունը:

«Հայկական ժամի» հոդվածում նշված «որոշումը» Միավորված ազգերի կազմակերպությունն ընդունել է դեռ 2018-ին: Իրականում սա 2018-ի դեկտեմբերի 19-ին ՄԱԿ-ի Գլխավոր ասամբլեայում որպես բանաձև հավանության արժանացած միգրացիայի հարցերով համապարփակ համաձայնագիրն է (Global Compact for Safe, Orderly and Regular Migration): 

Նյութում սխալ են ներկայացված բանաձևի բովանդակությունն ու նշանակությունը:

Բանաձևի ընդունումը նախատեսված է եղել դեռ 2016-ին ընդունված Նյու Յորքի հռչակագրով: Բանաձևը, սակայն, ամենևին պարտադիր բնույթ չունի և չի սահմանում ընդունող երկրների համար նման պարտավորություններ: Բանաձևի ընդունման նպատակը միջազգային միգրացիայի մի շարք հարցերի ու խնդիրների կարգավորումն է: Այն նախատեսում է միգրացիայի վերաբերյալ միասնական մոտեցում ձևավորել:

Hzham.am-ի հրապարակման մեջ գրված է, որ բանաձևին կողմ է քվեարկել մասնակից 193 երկրից 181-ը: Բանաձևը, սակայն, ընդունվել է 152 կողմ, 12 ձեռնպահ և 5 դեմ ձայներով: ՄԱԿ-ի անդամ 24 երկիր չի մասնակցել քվեարկությանը: Բանաձևին կողմ է քվեարկել նաև Հայաստանը: Հրապարակման մեջ իրականությանը չի համապատասխանում նաև դեմ քվեարկած երկրների ցանկը. «Ավստրիան, Լեհաստանը, Չեխիան, Բուլղարիան, Իսրայելը, Ավստրալիան, Շվեյցարիան, Ամերիկան ու այլ խոշոր ու իրենց ազգային պետականության անվտանգության համար պայքարող երկրներ»։ Բանաձևին դեմ են քվեարկել Չեխիան, Հունգարիան, Իսրայելը, Լեհաստանը և ԱՄՆ-ն:

Ըստ այդ նյութի տրամաբանության, վարչապետ Փաշինյանը փորձում է պակիստանցիներին և հնդիկներին «որպես տուրիստներ ներկայացնել»․ իսկ եթե ՄԱԿ-ը որոշի, որ «1 միլիոն ադրբեջանցի պետք է գա Հայաստան», երկիրը պարտավոր է ընդունել: Ինչպես արդեն նշեցինք, սակայն, ՄԱԿ-ի բանաձևը իրավական ուժ չունի, հետևաբար նյութում առկա այս և նման պնդումներն իրականության հետ որևէ աղերս չունեն: 

Հատկանշական է, որ ՄԱԿ-ի այս բանաձևը համացանցում տարատեսակ քննարկումների առարկա է դարձել նաև նախկինում: Fip.am-ն այս թեմային անդրադարձել էր նախորդ տարվա հունվարին: Այն ժամանակ գրեթե նույն բովանդակությամբ հրապարակում էր տարածել Lurer.com կայքն այն բանից հետո, երբ ԱԺ արտաքին հարաբերությունների մշտական հանձնաժողովի նախագահի թեկնածու, «Իմ քայլը» դաշինքի պատգամավոր Ռուբեն Ռուբինյանը հայտարարել էր, թե Հայաստանի արտաքին քաղաքականության կտրուկ փոփոխություն չի լինի առանց ժողովրդի դրական արձագանքի:

Այսպիսով, «Հայկական ժամ» լրատվական գործակալության կայքում տեղ գտած՝ ՄԱԿ-ի որոշմամբ ներգաղթյալներ ընդունելու վերաբերյալ տեղեկությունները չեն համապատասխանում իրականությանը: