Վարդան Ղուկասյանի մեղադրանքը կոռուպցիոն գործի մասին է․ Լավրովը ասուլիսում սուտ է խոսել

Ռուսաստանի արտաքին գործերի նախարար Սերգեյ Լավրովը հունվարի 20-ին իր ասուլիսում անդրադարձել է Գյումրու քաղաքապետ Վարդան Ղուկասյանի նկատմամբ առաջադրված մեղադրանքին և դա համարել քաղաքական հետապնդում։ 

«Նրան (Վարդան Ղուկասյանին-խմբ․) մեղադրանք է առաջադրվել այն բանի համար, որ կոչ է արել դիտարկել Հայաստանի միացումը Ռուսաստան-Բելառուս դաշինքին, և  կալանավորել նրան քաղաքական հայացքները արտահայտելու համար, որոնք ոչ մի կերպ ուղղված չեն Հայաստանի ինքնիշխանության և տարածքային ամբողջականության դեմ, այլ ավելի շուտ ուղղված են նրա արտաքին հարաբերությունների մաքսիմալացմանը՝ սեփական զարգացման շահերից ելնելով, լուրջ մտահոգություն է առաջացրել»,- հայտարարել է ՌԴ արտգործնախարարը:

Խոսքի վերջում էլ հույս է հայտնել, որ ՌԴ-ի հետ համագործակցության ամրապնդմամբ հանդես եկող քաղաքական գործիչները հետապնդման չեն ենթարկվի։

«Փաստերի ստուգման հարթակն» ուսումնասիրել է Լավրովի այս հայտարարությունը և պարզել, որ այն չի համապատասխանում իրականությանը, կեղծիք է։ 

Վարդան Ղուկասյանը այս պահին կալանքի տակ է, թեպետ առողջական խնդիրների հետևանքով պարբերաբար տեղափոխվում է հիվանդանոց։ Նրա վերաբերյալ գործով դատական նիստեր են ընթանում։ 

Հակակոռուպցիոն կոմիտեի քննությանը տեղեկացրել էին, որ մեծածավալ օպերատիվ-հետախուզական միջոցառումների և գաղտնի քննչական գործողությունների արդյունքում փաստական տվյալներ են ստացվել Գյումրի համայնքի ղեկավարի և գլխավոր ճարտարապետի կողմից նախնական համաձայնությամբ կաշառք-գումարներ պահանջելու և ստանալու դեպքերի վերաբերյալ։

Ըստ հաղորդագրության՝ քննությամբ պարզվել է, որ քաղաքացու կողմից Գարեգին Նժդեհ փողոցի 1/9 հասցեում կառուցված շուրջ 1500 քմ ինքնակամ շինությունը ենթակա է եղել քանդման։ Ըստ մեղադրանքի՝ համայնքի ղեկավարը և գլխավոր ճարտարապետը խոստացել են չձեռնարկել քանդման միջոցներ, կազմել կեղծ փաստաթղթեր և օրինականացնել շինությունը՝ դրա դիմաց պահանջելով 4 միլիոն դրամ կաշառք։ Վարույթի շրջանակում հրապարակվել էին նաև ձայնագրություններ, որտեղ Վարդան Ղուկասյանը խոսում է գումարների մասին։ 

Ինչ վերաբերում է Լավրովի մատնանշած գործին, ապա Քննչական կոմիտեում քննված քրեական վարույթով որոշվել էր դադարեցնել ՔՕ 422-րդ հոդվածի 2-րդ մասով հետապնդումը՝ մեղսագրված արարքը չկատարելու հիմքով: Այս վարույթի հիմքում Ղուկասյանի այն դիրքորոշումն էր, թե Հայաստանը պետք է Ռուսաստանի և Բելառուսի հետ միասին միևնույն միության անդամ լինի:

Ղուկասյանի նկատմամբ այս մեղադրանքն առաջադրվել էր 2025 թվականի հոտեմբերին՝ իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերը հոդվածով: 

Այսպիսով, Սերգեյ Լավրովը իր ասուլիսում Գյումրու համայնքի ղեկավարի (լիազորությունները դադարեցված) վերաբերյալ ներկայացրել է իրականությանը չհամապատասխանող տեղեկատվություն՝ ստեղծելով տպավորություն, թե Վարդան Ղուկասյանը ենթարկվում է քաղաքական հետապնդման իր դիրքորոշման համար։

Հասմիկ Համբարձումյան