Ապատեղեկատվություն՝ սփյուռքի նախարարի մասին

Վերջին ամիսներին հայկական մեդիատիրույթում բացված բազմաթիվ անհայտ ծագմամբ լրատվական կայքեր շարունակում են ապատեղեկատվություն տարածել՝ պարբերաբար թիրախավորելով հանրային ճանաչում ունեցող տարբեր անձնանց։ Թիրախներից մեկը սփյուռքի նախարար Մխիթար Հայրապետյանն է։

Նախ, սեպտեմբերի 14-ին «Փակագիծ» անհայտ ծագմամբ բլոգում տեղեկություն հայտնվեց, որ նախարարը մասնակցելու է Երևանում կայանալիք «ԼԳԲՏ քրիստոնյաների ֆորումին»։ Նյութի լուսանկարն էլ ընտրված է թեմային համապատասխան՝ Մխիթար Հայրապետյանի և ինչ-որ կիսամերկ տղամարդու լուսանկարների համադրումով։

Այս տեղեկությունը վերահրապարակեցին մի շարք կայքեր (narod.am; lratu24.ru; losarmnews.com; arcax.info; tvnewsyoutube.info և այլն)։ Ընդ որում, սեպտեմբերի 14-ին հրապարակած նյութը կայքերը վերահրապարակել են հերթով՝ ամեն օր մի կայք։ Արդյունքում այս տեղեկությունը համացանցում շրջանառվում է նաև այսօր։

Նշենք, որ ՀՀ սփյուռքի նախարարության մամուլի խոսնակ Նունե Այլանջյանը մեզ հետ զրույցում հայտնեց, որ վերոգրյալ տեղեկությունը իրականությանը չի համապատասխանում, և նախարարը չի այցելել և չի այցելելու որևէ ֆորումի։

«Կեղծ տեղեկություններ են։ Նախարարը չի այցելել այդ ֆորումին», — ասաց Այլանջյանը։

 

ՈՒՇԱԴՐՈՒԹՅՈՒՆ

Հարգելի՛ ընթերցող, տեղեկացնում ենք, որ SUT.am-ը շուտով հանդես է գալու նոր՝ «Փաստերի ստուգման հարթակ» անունով և FIP.am կայքով։