Հայկական ուժերը կլքեն Կապանի շրջակայքի դիրքերը․ քաղաքապետը հաստատում է

Այսօր՝ դեկտեմբերի 17-ին, լուրեր տարածվեցին, որ Կապան քաղաքի շրջակայքի դիրքերը հանձնվում են Ադրբեջանին։

Սյունիքի մարզի բնակիչները բողոքի ակցիաներ են սկսել՝ պահանջելով սահմանի անվտանգության երաշխիքներ։ Տարածվեցին նաև լուսանկարներ, որտեղ կամավորները և զինվորականները արդեն ապամոնտաժում էին դիրքերը։

«Փաստերի ստուգման հարթակը» կապ հաստատեց Կապանի քաղաքապետ Գևորգ Փարսյանի հետ՝ իրավիճակի վերաբերյալ տեղեկություններ ստանալու։ Փարսյանը նշեց, որ իրավիճակը շարունակում է լարված մնալ, քաղաքացիները շարունակում են ակցիաները, իսկ դիրքերը թողնելու հրամանն արդեն կա․ ինչ-որ բան փոխել հնարավոր չէ։ «Պաշտպանության նախարարության կողմից հրահանգ է իջեցվել, որ վաղը մինչև 17։00 պետք է էդ դիրքերից․․․ նահանջենք։ Նահանջենք մինչև Կապանի վարչական սահմաններ»,- նշեց Փարսյանը։ Քաղաքապետի խոսքով՝ բարձունքները թողնելու պատճառով «անվտանգության հետ կապված շատ լուրջ խնդիրներ են առաջանալու»։ 

Սյունիքի մարզի տարբեր հատվածներում սահմանային խնդիրներ եղել են նաև նախորդող օրերին։ «Փաստերի ստուգման հարթակը» անդրադարձել էր դրանցից մի քանիսի վերաբերյալ լուրերին։ Ադրբեջանական վերահսկողության տակ է անցնելու նաև Կապանի հարակից Ագարակ գյուղին կապող ճանապարհի մի մասը։ Կապանի քաղաքապետը հայտնել է նաև, որ Գորիս-Կապան ավտոճանապարհի այն հատվածներում, որոնք անցնում են ադրբեջանական կողմին, հերթապահելու են ռուս և հայ սահմանապահները:

Դեկտեմբերի 16-ին տեղեկությունների էին ստացվել նաև, որ Սյունիքի մարզի Որոտան համայնքում ռուս խաղաղապահներ են տեղակայվել։ Ավելի ուշ Սյունիքի մարզպետը հայտնեց, որ խաղաղապահներ տեղակայվելու են մարզի մի քանի բնակավայրերում ևս։

Հիշեցնենք նաև, որ դեկտեմբերի 13-ին տեղի ունեցած Անվտանգության խորհրդի նիստում վարչապետ Նիկոլ Փաշինյանը հայտարարել էր, որ առաջիկա օրերին պետք է որոշվեն Զանգելանի և Կուբաթլուի շրջանների սահմանները, որի պատճառով կարող է լարվածություն առաջանալ։ 

Խորհրդային տարիներին այս շրջանների տարածքում են եղել այժմ ՀՀ տարածքով անցնող մի շարք կարևոր նշանակության ճանապարհներ։

Անի Ավետիսյան