Սյունիքում փոխհրաձգություն չի եղել, բայց ադրբեջանական կողմը բարձրախոսով պահանջել է լքել դիրքերը

Դեկտեմբերի 13-ի ուշ երեկոյան հայկական լրատվամիջոցներով տարածվեցին տեղեկություններ, որ ադրբեջանցիները հայկական ինքնապաշտպանական ուժերին Կապանի մերձակայքի դիրքերը լքելու վերջնաժամկետ են տվել։

Ավելի ուշ տարածվեցին նոր հրապարակումներ, որ Կապանի Ագարակ գյուղի ուղղությամբ կես ժամ փոխհրաձգություն է եղել, իսկ թշնամին 10 ժամ է տվել դիրքերը լքելու համար։ 

Սյունիքի մարզպետարանն իր ֆեյսբուքյան էջում հերքեց լրատվամիջոցների տարածած տեղեկությունները: «Հայտնում ենք, որ տեղեկությունը չի համապատասխանում իրականությանը, Կապանի սահմաններին փոխհրաձգություն չի եղել, մեր սահմանները պաշտպանված են ու իրավիճակը վերահսկվում է»,- նշված էր հայտարարության մեջ։

«Փաստերի ստուգման հարթակը» փորձեց Կապանի քաղաքապետարանից պարզել՝ ի վերջո, որևէ միջադեպ գրանցվե՞լ է, թե՞ ոչ։

Կապանի քաղաքապետ Գևորգ Փարսյանը Fip.am-ի հետ զրույցում հաստատեց, որ ադրբեջանական կողմից պահանջ է ներկայացվել լքել Կապանի մերձակայքի դիրքերը:

«Նման հայտարարություն հակառակորդի կողմից բարձրախոսով եղել է՝ մինչև առավոտ ժամը 8-ը, բայց մենք մինչև հիմա մեր դիրքերում ենք»,- ասաց նա։

Ըստ քաղաքապետի՝ բարձրախոսով հայտարարությունը եղել է Դավիթ Բեկ գյուղի հարակից հատվածից։

Ինչ վերաբերում է այն տեղեկությանը, որ հակառակորդը կես ժամ անդադար կրակել է Ագարակ գյուղի ուղղությամբ ու Կապանի պաշտպանական դիրքերի վրա, ապա Գևորգ Փարսյանը նշեց, որ որևէ փոխհրաձգություն տեղի չի ունեցել։

Ներկա պահին, քաղաքապետի խոսքով, իրավիճակը հանգիստ է, մարզում մարտական բարձր պատրաստություն է հայտարարված։

Նշենք, որ Կապան խոշորացված համայնքն ընդգրկում է 38 բնակավայր, որոնց թվում են նաև Ագարակ և Դավիթ-Բեկ գյուղերը։

Նելլի Լազարյան