Վրացական կողմը սուտ է հանում ՀՀ պաշտոնյաներին

Վրաստանի պաշտպանության նախարարությունը պաշտոնապես հայտարարել է, որ Հայաստանը դեռևս հուլիսին հաստատել է իր մասնակցությունն Agile Spirit 2017 զորավարժություններին:

Մասնավորապես, Վրաստանի պաշտպանության նախարար Լևան Իզորիան «Ազատություն» ռ/կ հարցմանն ի պատասխան հայտնել է, որ Վրաստանը փետրվարի 2-ին հրավերներ էր ուղարկել տարբեր երկրներին՝ ներառյալ Հայաստանին, զորավարժություններին մասնակցելու համար: Հրավերի պաշտոնական նամակը ստանալուց հետո Հայաստանի Զինված ուժերի երկու ներկայացուցիչներ մասնակցել են Վրաստանում 2017թ․ հուլիսի 10-13-ը կայացած վերջնական ծրագրավորման համաժողովին և հաստատել հայաստանցի երեք սպաների մասնակցությունը միջազգային զորավարժությանը:

Վրաստանի պաշտպանության նախարարը, այդպիսով, հերքել է հայկական կողմի այն տեղեկությունները, թե Երևանը պաշտոնապես չի հաստատել մասնակցությունը զորավարժություններին:

Ինչպես հայտնի է, զորավարժությունների մեկնարկի նախորդ օրը՝ սեպտեմեբերի 3-ին վրացական կողմը տեղեկացրեց, որ Հայաստանը հրաժարվել է զորավարժություններին մասնակցելուց, թեև մինչ այդ հաստատել էր մասնակցությունը:

Ի պատասխան՝ ՀՀ պաշտպանության փոխնախարար Արտակ Զաքարյանը հայտարարել էր, թե Հայաստանը պաշտոնապես չի հաստատել իր մասնակցությունը զորավարժություններին: Նույնաբովանդակ հայտարարություններ էին արել նաև ՊՆ խոսնակ Արծրուն Հովհաննիսյանն ու Ազգային ժողովի փոխնախագահ Էդուարդ Շարմազանովը:

Ստացվում է, որ Վրաստանի պաշտպանության նախարարը, փաստացի, սուտ է հանում  ՀՀ պաշտոնյաների բոլոր այս պնդումները:

Հարկ է նաև նշել, որ զորավարժությունների լոգոյի վրա առնվազն մինչ օգոստոսի 29-ը եղել է նաև Հայաստանի դրոշը, ինչը ևս վկայում է, որ Երևանը հաստատել է իր մասնակցությունը զորավարժություններին:

Ավելացնենք նաև, որ մամուլում Agile Spirit 2017-ին Հայաստանի մասնակցության վերաբերյալ լուրեր հրապարակվել են սկսված հուլիս ամսից: