Պատգամավոր Պապոյանը «մի փոքր» սխալվում է․ ոչ թե հունվար-մարտ, այլ հունվար-մայիս, ոչ թե 12,740, այլ 12,800, ոչ թե 841, այլ 781

ԹԱՐՄԱՑՈՒՄ․  Այս նյութի հրապարակումից հետո՝ 14։52-ին, Գևորգ Պապոյանը խմբագրել է գրառումը՝ շտկելով տվյալները։ «Տեխնիկական փոքրիկ վրիպակ կար, որը ուղղվեց», — հետգրությամբ հավելել է Պապոյանը։

Այսօր առավոտյան Գևորգ Պապոյանը, հղում կատարելով Վիճակագրական կոմիտեին, հրապարակում է կատարել, որտեղ կան փաստական որոշ սխալներ։ Պապոյանը ֆեյսբուքյան իր էջում, մասնավորապես, գրել է․ «Ըստ ԱՎԾ-ի, 2022 թ. հունվար-մարտ ամիսներին արձանագրվել է 13,581 ծնունդ և 12,740 մահ: Բնական աճը կազմել է 841 մարդ: Նույն ժամանակաշրջանում արձանագրվել է 6477 ամուսնության և 1858 ամուսնալուծության դեպք»:

Վիճակագրական կոմիտեն «այս» տվյալները հրապարակել է երեկ՝ հուլիսի 6-ին։ Սակայն տվյալները վերաբերում են ոչ թե հունվար-մարտ, այլ հունվար-մայիս ամիսներին։ Սոցիալ-տնտեսական վիճակի մասին Վիճկոմի հրապարակած տեղեկագրի բաժիններից մեկում՝ սոցիալ-ժողովրդագրական հատվածում, ամփոփված են հենց Պապոյանի հրապարակած տվյալները։ 

Ըստ Վիճկոմի նախնական տվյալների՝ 2022 թվականի հունվար-մայիսին ծնվածների թիվը կազմել է 13,581 մարդ, ինչպես նշված է Պապոյանի հրապարակման մեջ, սակայն մահացածների իրական թիվը ոչ թե 12,740 է, այլ 12,800։ Հետևաբար, բնական հավելաճի մասին Պապոյանի տվյալը նույնպես սխալ է։ Բնական հավելաճը հունվար-մայիսին եղել է ոչ թե 841, այլ 781 մարդ։

Վիճկոմն այս տվյալները հրապարակել է նաև ինֆոգրաֆիկայի տեսքով, որին կարող եք ծանոթանալ այստեղ։

Նախորդ երկու տարիների տվյալները

Վիճկոմի այս տեղեկագրում համեմատության համար ներկայացված են նաև նախորդ երկու տարիների տվյալները, ըստ որոնց, 2020-ի հունվար-մայիս ամիսներին ծնվածների թվաքանակը եղել է 12,799 մարդ, մահացածներինը՝ 11,636, բնական հավելաճը՝ 1163 մարդ։ Հետպատերազմական 2021-ի հունվար-մայիս ամիսներին ծնվածների թիվը եղել է 14,351 մարդ, մահացածներինը՝ 14,141, բնական հավելաճը՝ 127 մարդ։ Ընդհանուր առմամբ, վերջին երեք տարիների նույն ժամանակահատվածում բնական հավելաճի ամենամեծ ցուցանիշը եղել է 2020-ին։

2020-ին ամուսնությունների թիվը կազմել է 4178, ամուսնալուծություններինը՝ 1217, 2021-ին՝ ամուսնություններինը՝ 6731, ամուսնալուծություններինը՝ 1648, իսկ 2022-ին՝ ամուսնություններինը՝ 6477, ամուսնալուծություններինը՝ 1858։

Այսպիսով, թեև Պապոյանը տվյալները վերցրել է Վիճկոմից, սակայն երեք նախադասությունից բաղկացած իր գրառման մեջ երեք տվյալ սխալ է ներկայացրել։  

Նարեկ Մարտիրոսյան