Տիգրանաշենի ճանապարհին բեռնատարի այրման պատճառը ադրբեջանական կրակոցը չէ (տեսանյութ)

Ֆեյսբուքյան օգտատեր Արթուր Գրիգորյանը սեպտեմբերի 17-ին հայտնել էր, որ Երասխից դեպի Տիգրանաշեն գնացող հատվածում ադրբեջանցիների կողմից թիրախավորվել է հայկական բեռնատար մեքենա:

Նա նշել էր, որ իրավապահ մարմինների կողմից հարուցվել է քրեական գործ: «Բայց քանի-որ ինչ-ինչ օղակներում չեն ցանկանում որպեսզի ԱՄՆ-ի, ՌԴ-ի, ԻԻՀ-ի և այլ երկրների պետական գերատեսչություններն իմանան, որ Ադրբեջանի զինված ուժերը թիրախավորում են խաղաղ բնակիչներին, գործը փորձում են կոծկել՝ ներկայացնելով որպես մեքենայի ինքնահրկիզում»:

Սեպտեմբերի 14-ին «Փաստերի ստուգման հարթակի» լրագրողական թիմը եղել է ճանապարհի այդ հատվածում, որտեղ տեղի է ունեցել միջադեպը:

Լրագրողի հետ զրույցում բեռնատար մեքենայի վարորդը հայտնել է, որ հավանաբար այրումը տեղի է ունեցել տեխնիկական պատճառներով: Այսինքն, վարորդը հերքել է կասկածը, որ հրդեհը տեղի է ունեցել ադրբեջանական զինված ուժերի բացած կրակի պատճառով:

FIP.am-ի թիմը տեսանկարահանել է արդեն այրված մեքենան: 

Մենք կապ հաստատեցինք նաև Քննչական կոմիտեի լրատվության ծառայության հետ՝ խնդրելով մեկնաբանել միջադեպի պատճառները: ՔԿ մամուլի խոսնակ Վարդան Թադևոսյանը տեղեկացրեց, որ բեռնատարի վարորդը հայտնել է իրավապահներին դեպքի մանրամասները: Մասնավորապես, ըստ նրա, վարորդը Երասխավան Զանգակատուն ճանապարհին ծուխ է նկատել մեքենայի կցորդիչի ձախ անիվի կողմից, անջատել է շարժիչը, դուրս է եկել և իր ձեռքի տակ եղած երկու կրակմարիչներով փորձել է մարել հրդեհը, հավաքված մարդիկ անմիջապես զանգել են ԱԻՆ: Մեքենան Հայաստանից ՌԴ գազավորված ըմպելիքներ էր տեղափոխում: Դեպքի առիթով քրեական գործ է հարուցվել, քննությունը շարունակվում է:  

Այսպիսով, պնդումը, թե Երասխից դեպի Տիգրանաշեն գնացող հատվածում ադրբեջանցիների կողմից թիրախավորվել է հայկական բեռնատար մեքենա, սխալ է: 

Լուսինե Ոսկանյան