Դասագրքում Սարյանի նկարն է, որում համբուրվողները ոչ թե կանայք են, այլ կին ու տղամարդ. Գրականագետը սխալվում է

Նոյեմբերի 30-ին Hraparak.am-ը հրապարակել է գրականագետ, դասագրքերի հեղինակ Դավիթ Գասպարյանի հետ զրույցը, որում վերջինս պնդում է, թե «7-րդ դասարանի փորձարկվող դասագրքերից մեկում երկու աղջիկ համբուրվում են»։

«Սթափ մարդու հայացքով՝ այն ամենը, ինչ արվում է, աղետ է։ «Գրականություն» առարկայի 7-րդ դասարանի փորձարկվող դասագրքերից մեկում, որն ստեղծել է «Զանգակի» հեղինակային խումբը, 79-րդ էջում կա մի նկար, որտեղ երկու աղջիկ համբուրվում են, և դա մատուցվում է 7-րդ դասարանի աշակերտին՝  հասունացման շրջանում գտնվող 13 տարեկան երեխային»,- նշել է գրականագետը։

«Փաստերի ստուգման հարթակը» փորձեց պարզել, թե արդյո՞ք «Զանգակ» հրատարակչությունը փորձարկվող դասագրքում համբուրվող երկու կանանց նկար է տեղադրել։ 

FIP.am-ի հետ զրույցում hրատարակչության հանրային կապերի պատասխանատու Սյուզան Չիչակյանը նշեց, որ նկարը Մարտիրոս Սարյանի ամենահայտնի նկարներից մեկն է։

«Փորձարկվող դասագրքի 79-րդ էջի նկարը Սարյանի ամենահայտնի նկարներից՝ «Հեքիաթներ ու երազներ» շարքի «Սեր: Հեքիաթ» նկարն է»,- ասաց նա։ 

«Սեր: Հեքիաթ» նկարի մասին համառոտ նկարագրություն կա նաև Սարյանի տուն-թանգարանի ֆեյսբուքյան էջում․ նշվում է, որ այս նկարը Սարյանի «Հեքիաթներ և երազներ» (1903-1906) ջրանկարների շարքի գլուխգործոցն է։ 

«Տղամարդն ու կինը միաձուլվել են հավերժ համբույրով: Նրանց քնքշորեն փարվել է վիթը: Հեռվում ծովի ջրերը օրորում են նավակը: Ողջ կոմպոզիցիայի գունային լուծումները հիմնված են մուգ կապույտից երկնագույն և բաց երկնագույն երանգների անցումների վրա: «Սեր: Հեքիաթը» Մ. Սարյանի սիրելի աշխատանքներից է»,- նշված է տուն-թանգարանի ֆեյսբուքյան էջում։

Նկարի մասին vnews.am-ին ծավալուն մեկնաբանություն է տվել նաև Սարյանի տուն-թանգարանի գլխավոր ֆոնդապահ, նկարչի թոռնուհի Սոֆյա Սարյանը։ 

«Եթե ուշադիր նայեք, կտեսնեք, որ այս երկու ֆիգուրները իրարից շատ են տարբերվում, տարբեր ուրվագիծ, տարբեր գունային բնութագիր ունեն: Օրինակ, եթե պարսկական գեղարվեստն ուսումնասիրենք, կտեսնենք, որ այդպիսի երիտասարդներ շատ կային՝ երկարամազ ու կրունկ ունեցող մակուպ կոշիկներով: Աջ ֆիգուրում կանացի գծերն ու էությունն ընդգծված են, նրան հառնում է գազելը, որ ավելի է նրբացնում այդ կերպարը, իսկ ահա ձախ ֆիգուրը բավական առնական է: Մանավանդ, եթե ուշադիր նայենք նկարում պատկերված թռչունին, որ գտնվում է ոսկե վանդակի մեջ, կարող ենք հիշել հեքիաթներից հայտնի հազարան բլբուլին, որը սիրո խորհրդանիշ էր և եթե գտնվեր այդ թռչունը, եթե տղան գտներ ու այն բերեր աղջկան, ապա աշխարհը կլցվեր ներդաշնակությամբ ու սիրով, չար ուժերը կպարտվեին, սերն ու միաբանությունը կհաղթեր: Հենց ասես այդ պահն է պատկերված այստեղ. տղան բերել ու աղջկան է տվել հազարան բլբուլը»,- լրատվամիջոցին ասել է Սարյանի թոռնուհին։

Այսպիսով, Hraparak.am-ի զրուցակցի պնդումը, թե փորձարկման ներկայացված «Գրականություն» առարկայի 7-րդ դասարանի դասագրքի 79-րդ էջի նկարում համբուրվող կանայք են պատկերված, սխալ է։ Նկարը Սարյանի «Սեր: Հեքիաթ» նկարն է, որում՝ ոչ թե երկու կնոջ, այլ կնոջ և տղամարդու համբույր է պատկերված։ 

Նելլի Լազարյան