«Հայկական արբանյակից առաջին լուսանկար» ներկայացվողը կեղծ է․ Լուսանկարը վերցված է Google Earth-ից

Civic.am լրատվական կայքը, որը կապված է կառավարող «Քաղաքացիական պայմանագիր» կուսակցության հետ, քիչ առաջ լուսանկար է հրապարակել, որին կից տեքստում գրված է, թե հայկական արբանյակը լուսանկար է արել Եվլախում գտնվող ադրբեջանական ռազմական օդանավակայանից։ 

Լուսանկարը տարածվել է նաև Թվիթեր սոցիալական հարթակում և տելեգրամ խմբերից մեկում, ինչպես նաև՝ մի շարք սունկ-կայքերում։ 

Լուսանկարի ուսումնասիրությունից պարզ դարձավ, որ այն վերցված է Google Earth արբանյակային նկարների համակարգից։

Google Earth-ում փնտրելով Եվլախի օդանավակայանը՝ կարող ենք տեսնել նույն օբյեկտները, ինչ համացանցում տարածվող լուսանկարում է, ընդ որում՝ ավելի բարձ որակի։

Եթե ավելի մոտիկից ուսումնասիրենք լուսանկարները, ապա կտեսնենք, որ տարածքում առկա շարժական օբյեկտները (մեքենաներ, ինքնաթիռներ և այլն) նույն դիրքում են, ինչը ևս մեկ ապացույց է, որ սա հենց Google Earth-ից վերցված լուսանկար է։

Եթե նույնիսկ այս ամենը չնկատենք, ապա ակնհայտ է, որ տարածվող լուսանկարը վերցված է հենց Google Earth-ից, որի ապացույցը լուսանկարի վերևի ձախ անկյունում երևացող Earth համակարգի ժամանակացույցն է և ներքևի հատվածում նկարի հեղինակային իրավունքի մասին վկայող գրությունը։

Բարձր տեխնոլոգիական արդյունաբերության նախարարությունը (ԲՏԱ) ևս հերքում է լուսանկարի հայկական լինելու մասին տեղեկությունը։ «Փաստերի ստուգման հարթակին» նախարարությունից հայտնեցին, որ այս լուսանկարը հայկական արբանյակի կողմից չի նկարվել, իսկ արբանյակի առաջին լուսանկարները կարող ենք տեսնել առաջիկայում՝ սարքի թեստավորումից հետո։ 

Այսպիսով՝ համացանցում տարածվող լուսանկարը որևէ առնչություն չունի հայկական արբանյակի արած լուսանկարի հետ, այն վերցված է Google Earth արբանյակային լուսանկարներ տրամադրող ծառայությունից։

Հ․Գ․ հրապարակման պատրաստման ընթացքում civic.am-ը հեռացրել է հրապարակումը, սակայն այն պահպանվել է արխիվում։ Հղումը՝ այստեղ։

Ավելի ուշ կայքը հերքում է հրապարակել՝ պարզաբանելով, որ ապատեղեկատվություն պարունակող նյութը վերցրել էին ինչ-որ ֆեյսբուքյան խմբից։

Նարեկ Մարտիրոսյան