Ծիծեռնակաբերդի խճուղին կշարունակի շահագործվել առանց 4-րդ գոտու․ քաղաքապետարանի խոստման հետքերով

2022 թվականի մայիսի 20-ին փլուզվեց Ծիծեռնակաբերդի խճուղու մի հատվածը։ Քաղաքային իշխանությունները ձեռնամուխ եղան փլուզված հատվածի վերականգնմանը և խոստացան սեղմ ժամկետներում վերականգնել ճանապարհի երթևեկությունը։

Ըստ քաղաքապետարանի՝ փլուզմանը կարող էր նպաստած լիներ այդ հատվածով անցնող անձրևատարի տեխնիկական անսարքությունը: Սակայն նախորդ տարվա մայիսի  27-ին քաղաքապետարանը հայտարարեց, որ Ծիծեռնակաբերդի խճուղում փլուզված հատվածի վերականգնման աշխատանքները պարտավորվել է սեփական միջոցների հաշվին կատարել ճամփեզրին շինարարություն իրականացնող «Սահակյանշին» ընկերությունը։ 

Հունիսի 9-ին քաղաքապետարանը հայտարարեց, որ «ճանապարհի փլուզված հատվածի վերակառուցումը մտել է վերջնական փուլ»։

4 օր անց՝ հունիսի 13-ին, քաղաքապետարանը ֆեյսբուքյան գրառմամբ տեղեկացրեց, որ Ծիծեռնակաբերդի խճուղու փլուզված ամբողջ հատվածը վերականգնված է և արդեն հանձնված է շահագործման։

Նույն հայտարարությամբ, սակայն, քաղաքապետարանը հայտարարել էր, որ «երթևեկությունը խնդրահարույց հատվածում ժամանակավորապես կիրականացվի երեք ուղեգծով՝ երկու լիարժեք ուղեգիծ Դալմա Գարդեն Մոլից դեպի ՄՀՀ և մեկը՝ ՄՀՀ-ից դեպի Դալմա Գարդեն Մոլ: Վերջին հանգամանքը պայմանավորված է նրանով, որ Ծիծեռնակաբերդի խճուղու հարակից տարածքում իրականացվող շինարարական աշխատանքներին զուգահեռ անհրաժեշտ է իրականացնել ամրաշինական միջոցառումներ՝ ապագայում համանման իրավիճակներից խուսափելու նպատակով»:

Հաշվի առնելով այն փաստը, որ մինչև փլուզումը ճանապարհն ուներ 4 երթևեկելի գոտի, քաղաքապետարանի կողմից «ամբողջ հատվածը վերականգնված» լինելու վերաբերյալ գրառումը հարցեր էր առաջացնում։ 

Ճանապարհի իսկապես ամբողջական վերականգնման համար որևէ ժամկետ սահմանված չէր, և «Փաստերի ստուգման հարթակը» ճանապարհի վերագործարկման հաջորդ օրը հարցում արեց քաղաքապետարանին՝ ե՞րբ ամբողջովին կվերականգնվի Ծիծեռնակաբերդի խճուղու երթևեկությունը 4 գոտիներով։

Հուլիսի 11-ին, քաղաքապետարանը տեղեկացրեց, որ ճանապարհն ամբողջությամբ կվերականգնվի 2 ամսվա ընթացքում։

«Ճանապարհի երթևեկելի 4-րդ գոտին (ոչ ամբողջական ճանապարհը, այլ ներկա երեք գոտիների փոխարեն գործարկել նաև 4-րդը) նախատեսվում է գործարկել 2 ամսվա ընթացքում», — գրված էր մեզ ուղարկված պատասխանում։

Քաղաքապետարանից ստացված պատասխանից անցել է ավելի քան կես տարի, սակայն Ծիծեռնակաբերդի խճուղու փլուզված հատվածի 4-րդ գոտին դեռևս չի վերաբացվել։

Լուսանկարներում և տեսանյութում երևում է, որ այս հատվածում աշխատանքներ չեն իրականացվում, կամ համենայն դեպս, դրանք տեսանելի չեն։ Ամեն դեպքում, չնայած եղանակային վատ պայմաններին՝ հարակից բազմաբնակարան շենքի շինարարությունն ընթանում էր մեծ թափով, մինչդեռ փլուզված հատվածում որևէ շինարարական տեխնիկա կամ շինարար չկար։

Քաղաքապետարանի լրատվության վարչության պետի տեղակալ Տարոն Գևորգյանը հայտեց, որ իրավական խնդիրներ են առաջացել, դրա համար աշխատանքներ չեն կատարվում․ «Քանի որ տարածքը համայնքային հող է, պետք է իրավական գնահատական և իրավական հստակեցում տրվի, որպեսզի կառուցապատողն իմանա՝ ինչ հիմքով և ինչ իրավական պատասխանատվությամբ է հարցը լուծվելու։ Մինչև այդ հարցը չհստակեցվի, որևէ այլ ընթացք չի կարող ունենալ»։

Հարցին՝ թե այդ դեպում ինչո՞ւ էր ամռանը քաղաքապետարանը խոստացել 2 ամսում ավարտել ճանապարհի վերականգնումը, Գևորգյանը պատասխանեց, որ այդ պահին նման խնդիր չէր առաջացել։

Գևորգյանը դժվարացավ այս անգամ հստակ ժամկետ նշել, թե երբ ի վերջո կլուծվեն իրավական խնդիրները և կսկսվի փլուզված ճանապարհի ամբողջական վերականգնումը։

Այսպիսով փաստենք, որ դեռևս ամռանը խոստացված՝ Ծիծեռնակաբերդի խճուղու ամբողջական վերականգնումը ոչ միայն դեռ չի սկսվել, այլ նաև առաջացել են իրավական խնդիրներ, որոնց լուծման վերաբերյալ նույնիսկ չկա որոշակիություն։ Իսկ Ծիծեռնակաբերդի խճուղին դեռևս կշարունակի շահագործվել 3 գոտիով։

Սևադա Ղազարյան