Քարոզչական էջերը խախտել են «լռության օրվա» կարգը — 2

«Փաստերի ստուգման հարթակը» շարունակում է անդրադառնալ Երևանի ավագանու ընտրության «լռության օրը»՝ սեպտեմբերի 16-ին, սոցիալական մեդիայում գովազդի միջոցով քարոզչություն իրականացրած էջերին։ 

Հիշեցնենք, որ համաձայն ՀՀ ընտրական օրենսգրքի 19-րդ հոդվածի՝ «քվեարկության և դրան նախորդող օրը քարոզչությունը հրապարակային ելույթների, հրապարակային միջոցառումների միջոցով, զանգվածային լրատվության միջոցներով, այդ թվում՝ կաբելային (մալուխային) ցանցով, արբանյակային կապով և վերգետնյա եթերային հեռարձակմամբ տեսալսողական մեդիածառայություն մատուցողների կողմից, ինչպես նաև համացանցում գովազդի միջոցով արգելվում է»։ 

Ավելի վաղ արձանագրել էինք սեպտեմբերի 16-ին քարոզչական բովանդակություն տարածող ֆեյսբուքյան այնպիսի էջեր, որոնք քարոզչություն են իրականացրել հօգուտ «Քաղաքացիական պայմանագիր» կուսակցության քաղաքապետի թեկնածու Տիգրան Ավինյանի և ընտրապայքարում նրա մրցակիցներ՝ Հայկ Մարությանի ու Մանե Թանդիլյանի դեմ։ 

Այս անգամ FIP.am-ն արձանագրել է ընտրություններին մասնակցող «Ապրելու երկիր» կուսակցության քաղաքապետի թեկնածու Մանե Թանդիլյանի օգտին «լռության օրը» քարոզչություն իրականացնող էջերին։ Մասնավորապես, «Yerevanci-Երևանցի» էջը 13 հրապարակման համար գովազդ է միացրել՝ խախտելով օրենքը։ 

Հրապարակումների թվում Մանե Թանդիլյանի նախընտրական հանրային ելույթներն են,  «Ապրելու երկիր» կուսակցության նախընտրական հոլովակները, ինչպես նաև Ռուբեն Վարդանյանի ուղերձը՝ ավագանու ընտրությունների վերաբերյալ։ 

«Փաստերի ստուգման հարթակը» շարունակում է համացանցի մշտադիտարկումը՝ արձանագրելու «լռության օրվա» կարգը խախտող սոցիալական մեդիայի էջերն ու օգտահաշիվները։ 

Նանե Մանասյան