Լաչինի միջանցքը չի պատկանում Ռուսաստանին. Արմեն Գրիգորյանը մանիպուլացնում է

Հայաստանի Անվտանգության խորհրդի քարտուղար Արմեն Գրիգորյանը Հանրային hեռուստատեսության եթերում Պետրոս Ղազարյանի հետ հարցազրույցում հայտարարել է, որ նոյեմբերի 9-ի հայտարարությամբ Լաչինի միջանցքը պատկանում է Ռուսաստանի Դաշնությանը և այնտեղ գտնվում են ռուս խաղաղապահները:

Պետրոս Ղազարյանի ճշտող հարցին՝ պատկանո՞ւմ է, թե վերահսկում է, Արմեն Գրիգորյանը պատասխանել է. «Պատկանում է, որովհետև նոյեմբերի 9-ի հայտարարությամբ Ադրբեջանի ստորագրությամբ Լաչինի միջանցքն ամբողջովին հանձնվել է ՌԴ-ին, և այս պահին Լաչինի միջանցքում տեղի ունեցող բոլոր իրադարձությունների ամբողջ պատասխանատվությունը կրում է Ռուսաստանի Դաշնությունը, որովհետև նոյեմբերի 9-ի հայտարարությամբ պատկանում է ՌԴ-ին»:

Իրականում, Ախ քարտուղարի հայտարարությունը մանիպուլյատիվ է: 

44-օրյա պատերազմի ավարտին ՀՀ վարչապետ Նիկոլ Փաշինյանի, Ադրբեջանի նախագահ Իլհամ Ալիևի և Ռուսաստանի նախագահ Վլադիմիր Պուտինի ստորագրած  հայտարարության 6-րդ կետում նշվում է. «Հայաստանի Հանրապետությունն Ադրբեջանի Հանրապետությանը վերադարձնում է Քելբաջարի շրջանը՝ մինչև 2020 թվականի նոյեմբերի 15-ը, իսկ Լաչինի շրջանը՝ մինչև 2020 թվականի դեկտեմբերի 1-ը: Լաչինի միջանցքը (5 կմ լայնությամբ), որն ապահովելու է Լեռնային Ղարաբաղի կապը Հայաստանի հետ և միաժամանակ շրջանցելու է Շուշի քաղաքը, մնում է Ռուսաստանի Դաշնության խաղաղապահ զորակազմի վերահսկողության ներքո»:

Հետևաբար պնդելը, թե Լաչինի միջանցքը պատկանում է Ռուսաստանի Դաշնությանը, մանիպուլյատիվ է: Եռակողմ հայտարարությամբ չի որոշվել միջանցքի պատկանելության հարցը: Այն նախատեսում է, որ Լաչինի միջանցքը ՌԴ խաղաղապահ զորակազմի վերահսկողության ներքո է մնում: 

Լուսինե Ոսկանյան