Հերքել պաշտոնականը՝ առանց հիմնավորելու․ Բագրատյանը պնդում է՝ ոչ թե մի քանի հազար, այլ մի քանի տասնյակ հազար արցախցի է լքել ՀՀ-ն

ՀՀ նախկին վարչապետ Հրանտ Բագրատյանը CivilNet-ի հետ զրույցում պնդել է, թե Հայաստանը լքած՝ բռնի տեղահանված արցախցիների թիվը 15-20 հազար է կազմում։ 

«Արցախը դատարկվեց, տեսեք ինչ մասսայաբար մեկնում են»,- ասել է Բագրատյանը։ 

Լրագրողի այն դիտարկմանը, թե արցախցիների զանգվածային արտագաղթի մասին տվյալները հերքվում են պաշտոնական տվյալներով, Բագրատյանը հակադարձել է․ «Իսկ ո՞վ ա հարցնում պաշտոնական տվյալները, նրանք (արցախցիները,-խմբ․) նույնիսկ որպես քաղաքացի չեն ֆիքսվում։ Իմ կարծիքով՝ մոտ 20 հազար արդեն գնացել են։ Ես ասում եմ հերոս գիտեմ, որ մեկնել ա․․․»։ 

«Փաստերի ստուգման հարթակն» ավելի վաղ անդրադարձել էր տեղեկատվական դաշտում պարբերաբար շրջանառվող՝ Հայաստանը լքած բռնի տեղահանված արցախցիների տարբեր թվերին։ 

Ըստ Ազգային անվտանգության ծառայության տրամադրած տվյալների՝ 2023 թվականի սեպտեմբերի 19-ից մինչև 2024 թվականի հունվարի 16-ն ընկած ժամանակահատվածում ՀՀ պետական սահմանի օդային ու ցամաքային անցման կետերով երկրից մեկնել է Լեռնային Ղարաբաղի հաշվառում ունեցող 12,203 անձ, որից 5770-ը վերադարձել է․ փաստացի, ընթացիկ տարվա հունվարի 16-ի դրությամբ ՀՀ-ից հեռացած և չվերադարձած՝ ԼՂ հաշվառում ունեցողների թիվը 6433 է։ 

Ըստ Բագրատյանի՝ պաշտոնական թվերը չեն արտացոլում իրական պատկերը, քանի որ արցախցիները որպես քաղաքացի չեն ֆիքսվում սահմանը հատելիս։ Մինչդեռ, ԱԱԾ-ն արձանագրում է Լեռնային Ղարաբաղի հաշվառում ունեցողների մուտքն ու ելքը՝ անկախ կարգավիճակից։ 

Այսպիսով, Բագրատյանն անվստահություն է հայտնում պաշտոնական տվյալների նկատմամբ՝ միևնույն ժամանակ չհիմնավորելով ՀՀ-ն լքած արցախցիների՝ իր առաջարկած թիվը։ 

Նանե Մանասյան