Զախարովան կեղծում է․ Արևմտյան խոշորագույն ԶԼՄ-ները լուսաբանել են Երևանում ընթացող բողոքի ակցիաները

ՌԴ արտաքին գործերի նախարարության պաշտոնական ներկայացուցիչ Մարիա Զախարովան մայիսի 15-ի ճեպազրույցի ժամանակ պնդել է, թե «արևմտյան լրատվամիջոցները լուսաբանում են Վրաստանում տեղի ունեցող բողոքի ակցիաները, բայց, միևնույն ժամանակ, լռում են Հայաստանում տեղի ունեցող գործողությունների մասին»։

 «Մենք տեսնում ենք, որ բառացիորեն, կարծես հրահանգավորված, ամերիկյան և եվրոպական լրատվամիջոցներն անում են ամեն ինչ Վրաստանում ցույցերը խթանելու համար։ Սակայն, ինչ վերաբերում է Հայաստանում ընթացող բազմահազարանոց բողոքի ակցիաներին, ապա արևմտյան մեյնսթրիմը բառացիորեն սքողում է դրանք, կարծես ձևացնում է, թե այնտեղ ոչինչ չի կատարվում»,- ասել է Զախարովան։

«Փաստերի ստուգման հարթակն» ուսումնասիրել է արևմտյան լրատվամիջոցների անդրադարձը Հայաստանում տեղի ունեցող բողոքի ակցիաների վերաբերյալ։ 

Այսպես, բրիտանական Reuters լրատվական միջազգային գործակալությունը, անդրադարձ կատարելով Երևանում մայիսի 9-ին տեղի ունեցած հանրահավաքին, գրել էր․ «Հինգշաբթի օրը Երևանում ցուցարարների մեծ բազմություն էր հավաքվել՝ պահանջելու վարչապետ Նիկոլ Փաշինյանի հրաժարականը՝ մի քանի սահմանամերձ գյուղեր հարևան և վաղեմի հակառակորդ Ադրբեջանին զիջելու որոշման պատճառով»։ 

Ավելի ուշ՝ մայիսի 13-ին, Reuters-ը նույնպես անդրադարձել էր թեմային՝ գրելով ոստիկանության կողմից բերման ենթարկված ցուցարարների մասին։

Ամերիկյան Associated Press լրատվական գործակալությունը անդրադարձել է և՛ մայիսի 9-ին և՛ մայիսի 10-ին տեղի ունեցած հանրահավաքներին։

«Հայաստանում հազարավոր ցուցարարներ, որոնք վրդովված են սահմանային որոշ գյուղերի վերահսկողությունը Ադրբեջանին հանձնելու կառավարության որոշումից, երկրորդ օրն է ցույց են անցկացնում մայրաքաղաքի կենտրոնում՝ պահանջելով վարչապետ Նիկոլ Փաշինյանի հրաժարականը»,— գրել էր լրատվականը մայիսի 10-ին կայացած հանրահավաքի մասին:  

Ավելի ուշ բողոքի ակցիաներին անդրադարձել են նաև ամերիկյան The Washington Post, ABC News և U.S.News լրատվամիջոցները՝ հղում անելով Associated Press գործակալությանը։

Գերմանական Deutsche Welle լրատվական գործակալությունը մայիսի 13-ին գրել էր, թե «Հայաստանի ոստիկանությունը հայտնել է, որ ձերբակալել է առնվազն 88 մարդու, որոնք փորձել են փակել փողոցները երկրի մայրաքաղաքում՝ ի նշան բողոքի Ադրբեջանին հողեր զիջելու կառավարության ծրագրերի դեմ»։

Երևանում բողոքի ակցիաներին անդրադարձել են նաև Agence France Press գործակալությունը, Le Monde-ն, Politico-ն, Fox News-ը, Euronews-ը, France24-ը, Eurasianet-ը և այլ լրատվամիջոցներ։

Այսպիսով, արևմտյան տասնյակ խոշորագույն լրատվամիջոցներ լուսաբանել են Երևանում ընթացող «Տավուշը հանուն հայրենիքի« շարժման գործողությունները․  Զախարովայի պնդումը, թե արևմտյան լրատվամիջոցները լուսաբանում են Վրաստանում տեղի ունեցող բողոքի ակցիաները, բայց «լռում են Հայաստանում տեղի ունեցող գործողությունների մասին», կեղծ է։ 

Սյուզաննա Համբարձումյան