Որքան է ՀՀ տարածքը ըստ դասագրքերի, ատլասների և Պետրոս Ղազարյանի

Մայիսի 15-ին Պետրոս Ղազարյանը հրապարակում էր արել իր ֆեյսբուքյան էջում, որտեղ նշում էր, թե 2014 թվականին հրապարակված դպրոցական ծրագրի «Աշխարհագրություն» առարկայի դասագրքում գրված է, որ Հայաստանի Երրորդ Հանրապետության տարածքի մակերեսը 29,743 քկմ է։ 

Գրառմանը Պետրոս Ղազարյանը կցել էր նաև երկու սքրինշոթներ։ Առաջին նկարում «Աշխարհագրություն» առարկայի 9-րդ դասարանի դասագրքի առաջին էջն էր, որտեղ երևում էր նաև գրքի հրատարակման տարեթիվը՝ 2014 թվական։ 

«Փաստերի ստուգման հարթակը» պարզեց, որ իսկապես՝ 2014 թվականին հրատարակված «Աշխարհագրություն» կամ «Հայաստանի աշխարհագրություն» առարկայի դասագրքում, «ՀՀ սահմանների ձևավորումը, աշխարհագրական դիրքը» դասի հենց առաջին պարբերության մեջ գրված է, որ Հայաստանի Հանրապետության տարածքի մեծության չափը 29,743 քկմ է։ 

Մենք փորձեցինք գտնել Հայաստանի Հանրապետության տարածքի չափի մասին որևէ այլ անդրադարձ ինչպես հանրակրթական ու բուհական դասագրքերում, այնպես էլ ՀՀ վիճակագրական տվյալներում։ 

Այսպես, 2022 թվականին ԵՊՀ հրատարակչության «Հայաստանի տնտեսական և սոցիալական աշխարհագրություն» բուհական դասագրքում գրված է․ «Հայաստանի Հանրապետության տարածքը զբաղեցնում է 29,743 քկմ տարածք»։ 

«Իմ դպրոց» կրթական հարթակը, որը գործում է 2015 թվականից, «Աշխարհագրություն» առարկայի բաժնում նույնպես Հայաստանի Հանրապետության տարածքը նշում է 29743 քկմ։ 

Բացի այդ, ՀՀ վիճակագրական կոմիտեի՝ 2004 թվականից ի վեր մինչև 2023 թվականը ներառյալ հրապարակած «Հայաստանի Հանրապետությունը մարզերով և քաղաք Երևանով» ատլասների շարքում ՀՀ տարածք է նշվում 29,743 քկմ-ը։ 

Այսպիսով, հիմք ընդունելով ինչպես հանրակրթական, այնպես էլ բուհական դասագրքերը և պետական հետազոտությունները, կարող ենք պնդել, որ Հայաստանի Հանրապետության տարածքը մինչև սահմանազատման գործընթացի մեկնարկն էլ կազմում էր 29,743 քկմ։ 

Ալյոնա Հայրապետյան