«Կենտրոն»-ի մանիպուլյացիան՝ ավագանու ընտրությունների մասին

Ընտրական քարոզարշավի շրջանակներում «Կենտրոն» հեռուսատընկերության ռեպորտաժներից մեկում լրագրողը ներկայացրեց «Գելափ ինթերնեյշնըլ ասոցիացիա»-ի հարցումների արդյունքները։ Դրանք վերաբերում էին Երևանի ավագանու ընտրություններին։

Հատկանշանական է, թե ինչպես են մեկնաբանվում հարցման արդյունքները հեռուստաընկերության և ասոցիացիայի տնօրենի կողմից։

«․․․Այսպիսով, հարցվածների 72.2%-ը մեծ համակրանք ունի «Բարգավաճ Հայաստան» կուսակցության նկատմամբ, երկրորդ հորիզոնականում «Իմ քայլը» դաշինքն է՝ 70% — ձայներով․․․»։

Ռեպորտաժում ցուցադրվում է հետևյալ աղյուսակը․

Փորձենք հասկանալ՝ արդյոք ամեն ինչ ըստ լրագրողի ներկայացրածի է:

Ըստ աղյուսակի՝ ԲՀԿ-ի հանդեպ «լիովին դրական» կարծիք ունի հարցվածների 24.9% -ը, իսկ «ավելի շուտ դրական»՝ 47.3%-ը։ Լրագրողը, սակայն, ներկայացնում է այս ամենի համագումարը՝ ընդհանուր՝  72.2%-ը, չմանրամասնելով սակայն տոկոսային հարաբերությունը։

Համեմատության համար ներկայացնենք, ըստ ռեպորտաժի, երկրորդ տեղը զբաղեցնող «Իմ քայլը» դաշինքի արդյունքները․ հարցվածների 42.0%-ը դաշինքին վերաբերվում է «լիովին դրական» (այսինքն 19%-ով ավելին, քան ԲՀԿ-ին),  28.3%-ը՝ «ավելի շուտ դրական»։ Այս երկու ցուցանիշները իրար գումարելը մեթոդական սխալ է։

Ի դեպ, «Կենտրոն» հեռուստաընկերությունը չխոսեց «ավելի շուտ բացասական» և «ընդհանրապես բացասական» վերաբերմունքի մասին, որտեղ պատկերը հետևյալն է՝

«Իմ քայլը» կուսակցությունների դաշինք — ավելի շուտ բացասական՝ 4.2%, ընդհանրապես բացասական՝ 5.9%

«Բարգավաճ Հայաստան» կուսակցություն — ավելի շուտ բացասական` 9.9% , ընդհանրապես բացասական՝ 11.0%:

Հաջորդ աղյուսակը ցույց է տալիս կուսակցությունների թեկնածուների հանդեպ վերաբերմունքը։

Այստեղ ևս լրագրողը շեշտում է Նաիրա Զոհրաբյանի այն արդյունքը, որը ավելի բարձր է մյուս թեկնածուների արդյունքներից․ ԲՀԿ-ի թեկնածուի  հանդեպ «ավելի շուտ դրական» վերաբերմունք ունի 43.6% ը՝ Հայկ Մարությանի 31.9%-ի դիմաց:

Սակայն հարկ է նաև  նշել, որ ըստ այս նույն աղյուսակի՝ Հայկ Մարությանի հանդեպ լիովին դրական վերաբերմունք ունի հարցվածների 39.5% ը, իսկ Նաիրա Զոհրաբյանի հանդեպ՝ 22.5%-ը, ինչի մասին ևս հեռուստաընկերությունը լռում է։

Հիշեցնենք, որ դեռևս 2014 թվականին  մամուլում հարցականի տակ էր դրվել «Գելափ»-ի  իրականացրած հարցումների հավաստիությունը։ Երևանի քաղաքային իշխանության աշխատանքի հետ կապված «Գելափ»-ի  իրականացրած հարցումների համաձայն ՝ 1066 քաղաքացուց 63 տոկոսը գոհ էր քաղաքային իշխանությունների աշխատանքից:

2015 թվականին քաղաքագետ Արմեն Գրիգորյանը Սահմանադրական բարեփոխումներ իրականացնելու վերաբերյալ «Գելափ»-ի իրականացրած հարցումները  իշխանության կողմից կազմակերպված կեղծ հարցումներ անվանեց։ Ըստ այդ հարցումների՝ քաղաքացիների 46 տոկոսը համարում էր, որ  Հայաստանում Սահմանադրական բարեփոխումներ իրականացնելու անհրաժեշտություն կա:  

Մինչդեռ մեկ այլ կազմակերպության իրականացրած սոցհարցման արդյունքների համաձայն՝ Հայաստանի բնակիչների 81%-ը չէր վստահում Սահմանադրական փոփոխությունների գործընթացին։

 

Կարինե Կիրակոսյան