Մետաքսե Հակոբյանը մանիպուլյատիվ պնդում է արել․ Արցախը 2023-ի սեպտեմբերին ընդունել է հումանիտար բեռ Ադրբեջանից

Մետաքսե Հակոբյանը, որը Լեռնային Ղարաբաղի Ազգային ժողովի պատգամավոր էր, հայտարարել է, թե Արցախի ժողովուրդը 2023 թվականի սեպտեմբերին ընդդիմացել ու չի ընդունել Ակնայով (Աղդամ) առաջարկվող հումանիտար օգնությունը։ 

«Եթե մենք վերադառնանք 2023 թվականի սեպտեմբեր, երբ Արցախում մարդիկ իրականում սովալլուկ էին ու ծանր վիճակ էր և պիտի լիներ նաև քաղաքական որոշում՝ թույլ տալ Ակնայով բեռները մտնեին Արցախ, թե ոչ։ Ես վախեցա ընդդիմանալ, և ես չհայտնեցի կոնկրետ կարծիք այդ առումով, քանի որ ժողովուրդը սոված էր և միգուցե ժողովուրդը ինքը համաձայնվի։ Եվ դուք շատ լավ հիշում եք ժողովուրդը ինչ արեց։ Ժողովուրդը իր որոշմամբ փակեց ճանապարհը և որևէ կերպ չընդունեց Ադրբեջանի տարածքով Արցախ մուտք գործող ցորենը», – նոյեմբերի 6-ին լրագրողների հետ ճեպազրույցում ասել է Մետաքսե Հակոբյանը։

«Փաստերի ստուգման հարթակի» ուսումնասիրությունը ցույց է տվել, որ Մետաքսե Հակոբյանի պնդումը մանիպուլյատիվ է, որովհետև հումանիտար բեռը մուտք է գործել ԼՂ 2023թ․ սեպտեմբերի 11-ին, երբ արդեն ԼՂ նախագահը Սամվել Շահրամանյանն էր։  

Այսպես, 2023 թ․ օգոստոս 29–30-ը դեպքերի հաջորդականությունն այսպիսին է եղել՝ Ադրբեջանը նախ հայտարարեց, որ պատրաստ է Աղդամի ճանապարհով հումանիտար բեռ ուղարկել դեպի Արցախ՝ պարենային օգնության տեսքով, որից հետո բողոքի ակցիաներ սկսվեցին մասնավորապես Ասկերանի շրջանում։ Ցույցերի կազմակերպիչները և իշխանությունները հայտարարեցին, որ չեն ընդունելու բեռը, քանի դեռ Լաչինի միջանցքը փակ է։

Այս մասով Մետաքսե Հակոբյանի նկարագրածը ճիշտ է, ժողովուրդը իսկապես փակել է ճանապարհը։

Սակայն արդեն սեպտեմբերի 9–10-ն ընկած ժամանակահավածում ռուսական և ադրբեջանական կողմերի միջև սկսվում են բանակցություններ՝ «հումանիտար ճգնաժամը մեղմելու» նպատակով։ Արդյունքում, իրավիճակ է փոխվում։ Սեպտեմբերի 9-ին ԼՂ Ազգային ժողովի կողմից փակ գաղտնի քվեարկությամբ ԼՂ նախագահ է ընտրվում Սամվել Շահրամանյանը։ 

Արդեն սեպտեմբերի 11-ին ԼՂ իշխանությունները պարենային ճգնաժամի պայմաններում, ընդունում են Կարմիր խաչի միջնորդությամբ առաջարկը, որ Աղդամի ճանապարհով բերվի հումանիտար բեռ։ Արդյունքում այդ օրը 15 տոննա մթերք և այլ անհրաժեշտ պարագաներ են Աղդամի ճանապարհով տեղափոխվել Ստեփանակերտ։ Սեպտեմբերի 18-ին արդեն տեղափոխված բեռը կազմել է 23 տոննա։ 

«Այս մարդասիրական առաքելությունը Կարմիր խաչի միջազգային կոմիտեի, Արցախում ՌԴ խաղաղապահ զորակազմի հրամանատարության և միջազգային միջնորդների մասնակցությամբ երկարատև քննարկումների արդյունք է՝ հաշվի առնելով Ադրբեջանի կողմից լիակատար շրջափակման հետևանքով ստեղծված ծայրահեղ ծանր հումանիտար իրավիճակը», –սեպտեմբերի 18-ին հայտարարել էր ԼՂ ԱԳՆ-ն։

(Լրացված)
Մարդու իրավունքների նախկին պաշտպան Արտակ Բեգլարյանը լուսանկար էր հրապարակել՝ հայտարարելով, որ ռուսական հումանիտար օգնությունը մուտք է գործել Ստեփանակերտ։

Այսպիսով, Մետաքսե Հակոբյանի հայտարարությունը մանիպուլյատիվ է, քանի որ նա ներկայացնում է օգոստոսյան դեպքերը որպես վերջնական արդյունք, անտեսելով, որ սեպտեմբերի 11-ին ԼՂ-ն արդեն ընդունել էր բեռը Ադրբեջանից՝ Կարմիր խաչի միջնորդությամբ։ Այսինքն՝ նա հին փաստն է ներկայացնում որպես ամբողջական իրականություն, ինչը մոլորեցնող է։

Հասմիկ Համբարձումյան