Սավչենկոն չի սատարել ադրբեջանցի դիվերսանտներին

Օրերս ադրբեջանական մամուլի կողմից տարածվեց տեղեկություն այն մասին, որ Ուկրաինայի խորհրդարանի՝ Գերագույն Ռադայի պատգամավոր Նադեժդա Սավչենկոն իր աջակցությունն է հայտնել Արցախում դատապարտված ադրբեջանցի դիվերսանտներին:

Մասնավորապես, խոսքը գնում է երկու ադրբեջանցիների՝ Շահբազ Գուլիևի ու Դիլհամ Ասկերովի մասին: Ովքեր, համաձայն պաշտոնական Ստեփանակերտի հատել էին Արցախի պետական սահմանը, կատարել հետախուզական գործողություններ, ինչպես նաև առևանգել և այնուհետև սպանել անչափահաս երեխայի:

Ադրբեջանական կայքերի այս տեղեկատվությունը նաև տարածեցին որոշ հայկական լրատվամիջոցներ, որոնք այդ կերպ փորձեցին վատթարացնել հայ-ուկրաինական հարաբերությունները:

Սակայն, մեր հարցմանն ի պատասխան, Ուկրաինայի խորհրդարանի Գերագույն Ռադայի պատգամավոր Նադեժդա Սավչենկոյի մամուլի ծառայությունը հերքեց ադրբեջանական մամուլի տարածած այդ տեղեկությունը:

Մասնավորապես, մեզ հայտնեցին, որ «Ահմեդ Շահիդովը պատմել է Շահբազ Գուլիևի և Դիլհամ Ասկերովի պատմությունը, սակայն որևէ բան ասելուց առաջ տիկին Սավչենկոն խնդրել էր ներկայացնել իրեն գործի փաստաթղթերը: Լուսանկարներից զատ որևէ փաստաթուղթ մինչև հիմա նա չի ստացել:

Անձամբ Սավչենկոն այս թեմայով որևէ հայտարարություն երբեք չի արել: Այս գործի վերաբերյալ տիկին Սավչենկոն հանդես կգա հայտարարությամբ, երբ տեղեկացված կլինի գործի մանրամասներին»:

Այսինքն, Սավչենկոն չի պաշտպանել ադրբեջանցի դիվերսանտներին, այլ, ընդամենը ուսումնասիրել է նրանց նկարները, որը իրեն ցուցադրել է Ահմեդ Շահիդովը և որը ադրբեջանական ԶԼՄ-ների կողմից մեկնաբանվել է որպես այդ անձանց սատարում:

Հ.Գ. Հիշեցնենք, որ 2014 թվականի դեկտեմբերի 29-ին, Ստեփանակերտում Լեռնային Ղարաբաղի ընդհանուր իրավասության առաջին ատյանի դատարանը հրապարակեց Շահբազ Գուլիևի և Դիլհամ Ասկերովի դատավճիռը: Ասկերովը դատապարտվեց ցմահ, իսկ Գուլիևը՝ 22 տարվա ազատազրկման: Երկու ադրբեջանցիներին մեղսագրվող հիմնական արարքը 17-ամյա Սմբատ Ցականյանի սպանությունն էր: