ՕԵԿ-ը չի իրագործել 2012-ի խոստումները

2012 թվականի խորհրդարանական ընտրություններից օրեր անց Օրինաց երկիր կուսակցությունը կոալիցիոն հուշագիր ստորագրեց ընտրությունների արդյունքներով մեծամասնություն հավաքած Հանրապեական կուսակցության հետ։

Քննադատություններին ի պատասխան ՕԵԿ ներկայացուցիչները շտապեցին հայտարարել, որ իշխանության մաս են կազմում սեփական նախընտրական ծրaգրերը ի կատար ածելու նպատակով։ Այդ ժամանակ անգամ հայտարարվեց, որ կառավարության ծրագիրը մշակվել է ՕԵԿ-ի նախընտրական ծրագրերի հիման վրա։

Ունենալով 3 նախարարական պորտֆել և փաստացի լինելով իշխանություն` ՕԵԿ-ը սակայն չի  իրագործել անգամ սեփական խոստումները։

Մասնավորապես, անդրադառնալով ընտանիքին, մայրության և մանկության խնդիրների լուծմանը` ՕԵԿ-ն առաջարկում էր առաջին երեխայի ծննդյան միանվագ նպաստի չափը դարձնել 100.000 դրամ,  երկրորդ երեխայի ծննդյան դեպքում`200.000 դրամ, երրորդ երեխայի համար` 500.000 դրամ։

Այսօր սակայն առաջին և երկրորդ  երեխաների ծննդյան միանվագ նպաստի չափը կազմում է ընդամենը 50.000 դրամ:

Ենթադրաբար, ՕԵԿ-ում հասկացել են, որ նմանօրինակ խոստումներով այլևս հնարավոր չէ ընտրությունների ժամանակ արդյունքի հասնել։ 2017 թվականի խորհրդարանական ընտրություններին Օրինաց երկիրը արդեն մասնակցում է, որպես  Հայկական վերածնունդ կուսակցության, իսկ ծրագրում շրջանցում է ծննդյան միանվագ նպաստի մասին հստակ խոստումները՝ նշելով միայն ծնվող երեխաներին հատկացվող գումարների մեծացման անհրաժեշտության մասին։

Չիրականացած հաջորդ խոստումը ուսանողների համար հանրային տրանսպորտից օգտվելու զեղչերի սահմանումն էր, որը ոչ միայն չի կատարվել, այլև 2015 թվականին փորձ արվեց բարձրացնել հասարակական տրանսպորտի սակագները։

Չիրականացված խոստումներին է դասվում նաև Վանաձոր-Ֆիոլետովո նոր երկաթուղային գծի կառուցումը, ինչպես նաև Իրանից դեպի Հայաստան նավթամթերքների փոխադրման խողովակաշարի կառուցումը և այլն։