Մեր հրապարակմանը ՀՀԿ արձագանքի զավեշտալիությունը

Ի պատասխան մարտի 24-ի SUT.am կայքի հրապարակման, որում բացահայտվում է դպրոցների և մանկապարտեզների 114 տնօրեննրի կողմից վարչական ռեսուրսի կիրառումը իշխող Հանրապետական կուսակցության օգտին` ՀՀԿ-ն հանդես եկավ հայտարարությամբ:

Ի թիվս լղոզված պնդումների, թե «Ընտրողների հետ աշխատանքը ենթադրում է քաղաքական ուժերի կողմից պոտենցիալ ընտրազանգվածի հավաքագրում, արձանագրում, մոբիլիզացում, նույնականացում», ՀՀԿ-ից նաև նկատում են, որ Ընտրական օրենսգիրքը չի արգելում Հայաստանի Հանրապետության քաղաքացիներին ներգրավված լինել քարոզչական և կազմակերպչական աշխատանքների մեջ աշխատանքային ժամից դուրս, աշխատանքային պարտականություններից դուրս:

Նշենք, սակայն, որ ինչպես հատուկ ընդգծվում է մեր հրապարակման մեջ, բոլոր զանգերը վերոհիշյալ տնօրեններին կատարվել են բացառապես աշխատանքային ժամերի, գրեթե բոլորը աշխատանքային հեռախոսահամարներին:

Իսկ թե ինչպե՞ս է ՀՀԿ-ն մանրակրկիտ ուսումնասիրել մեր հրապարակումը և չի նկատել այդ անչափ կարևոր նրբությունը, մնում է միայն կռահել:

Հանրապետականը նաև մեզ մեղադրել է «քաղաքականապես ուղղորդված անազնիվ գործելաոճի» մեջ: Ենթադրաբար իշխող կուսակցույթան դժգոհությունը առաջացրել է այն հանգամանքը, որ մենք ուսումնասիրել ենք բացառապես Հանրապետական կուսակցության կողմից վարչական ռեսուրսի կիրառումը:

Ենթադրաբար կարիքը չկա բացատրելու, որ վարչական ռեսուրս կարող է չարաշահել միմիայն այն քաղաքական ուժը, որը տիրապետում է վարչական ռեսուրսի: