Տնօրենների զանգերը աշխատանքային ժամերին են եղել

Մեկնաբանելով SUT.am կայքի մարտի 24-ի «ՀՀԿ-ն չարաշահում է վարչական ռեսուրսը դպրոցներում ու մանկապարտեզներում» հրապարակումը՝ Հանրապետական կուսակցության փոխնագահ Արմեն Աշոտյանը հայտարարեց, որ դա հակաքարոզչություն է իր կուսակցության դեմ:

Աշոտյանը «Իրազեկ քաղաքացիների միավորում» հասարակական կազմակերպությանը մեղադրեց ոչ օբյեկտիվության մեջ՝ ասելով, որ կազմակերպությունը հատուկ թիրախավորել էր հենց իրենց կուսակից տնօրեններին։

Նշենք սակայն, որ զանգերը կատարվել են բացառապես պատահական սկզբունքով, մեծամասնությունը համացանցում հասանելի հեռախոսահամարներին, որտեղ նշված չէ ոչ մի տնօրենի կուսակցական պատկանելիությունը։ Հավաստիացնում ենք, որ եթե մենք ունենայինք համապատասխան ռեսուրս զանգելու կամ նույնիսկ այցելելու Հայաստանի բոլոր դպրոցներ և մանկապարտեզներ մենք այդպես էլ կվարվեինք։

Բնական է նաև, որ պատահական սկզբունքով կատարված զանգերից պարզվեց, որ տնօրենները հիմնականում աշխատում են Հանրապետական կուսակցության համար, քանի որ այս կուսակցությունն է այսօր իշխանությունը և նա է հիմնական վարչական ռեսուրսի տիրապետողը։

Ավելին, ՀՀԿ փոխնախագահը նաև պնդեց, որ եթե  տվյալ տնօրեններն իրենց աշխատանքը իրականացրել են ոչ իրենց պաշտոնական լիազորությունների շրջանակներում, ոչ աշխատանքային ժամին, ուրեմն ակնհայտ է, որ ոչ մի խախտման մասին խոսք գնալ չի կարող։

Աշոտյանի այս պնդմանն ի պատասխան, սակայն, հրապարակում ենք կատարված զանգերի քաղվածքը, որտեղ երևում է, որ զանգերը կատարվել են բացառապես աշխատանքային ժամերին և հիմնականում աշխատանքային հեռախոսահամարներին։ Ավելին տնօրեններին հիմնականում հնարավոր չէր գտնել աշխատավայրում ժամը 16։00-ից հետո։

Բնական հարց է առաջանում, եթե տնօրենները ինչպես պնդում է Հանրապետական կուսակցությունը այդ աշխատանքը կատարել են աշխատանքային ժամերից հետո և աշխատավայրից դուրս, ապա ինչպե՞ս են այդ ցուցակները հայտնվել տնօրենների աշխատասենյակներում և աշխատանքային համակարգիչներում։

Եվ ի վերջո նշենք, որ խախտումներ հայտնաբերելու պարտականությունը դրված է Հայաստանի իրավապահ մարմինների վրա, ինչի մասին վերջին մեկ ամսում բազմիցս հայտարարել է «Իրազեկ քաղաքացիների միավորումը»։ SUT.am կայքի աշխատանքային թիմը միայն ցույց է տվել հավանական խախտումների վայրը և այն կատարող անձանց՝ օգնելով ոստիկանությանը, այլ ոչ ստանձնելով դրա պարտականությունները։

Զանգերի քաղվածքներին կարող եք ծանոթանալ այստեղ։