Ռուսական «Առաջին ալիքը» սուտ տեղեկություն է տարածում․ հանրահավաքին մասնակցել է 23,100 մարդ

Ռուսական «Առաջին ալիքն» այսօր անդրադարձել է Հանրապետության հրապարակում կայացած՝ «Տավուշը հանուն հայրենիքի» շարժման հանրահավաքին և տեղեկացրել, որ 100 հազարից ավելի մարդ է մասնակցել դրան։ 

«Ցուցարարների խումբը դրոշներով մոտեցել է կառավարության շենքին, ոստիկանությունը և հատուկ ջոկատայինները պատնեշել են տարածքը։ Կենտրոնական փողոցները փակ են»,- տեղեկացրել է հեռուստաալիքը։ 

Ռուսական պետական «Առաջին ալիքը», սակայն, սխալ ու չհիմնավորված տեղեկություն է տարածել։ 

«Իրազեկ քաղաքացիների միավորումը» իրականացրել է հանրահավաքի մասնակիցների հաշվարկ, որի համաձայն՝ «Տավուշը հանուն հայրենիքի» շարժման մայիսի 26-ի հավաքին մասնակցել է 23,100 մարդ։

««Իրազեկ քաղաքացիների միավորումն» աերոնկարահանման միջոցով իրականացրել է հանրահավաքի մասնակիցների հաշվարկ, որի արդյունքում պարզվել է, որ 17:12-ի դրությամբ Հանրապետության հրապարակում և հարակից տարածքներում գտնվել է շուրջ 23,100 մարդ: Հաշվարկն իրականացվել է մասնակիցների անհատական հաշվարկի միջոցով»,- ասվում է ԻՔՄ հաղորդագրության մեջ:

Նշենք, որ ԻՔՄ-ն Երևանում անցկացվող հանրահավաքների մասնակիցների հաշվարկ աերոնկարահանման միջոցով իրականացնում է սկսած 2018 թվականից՝ ներկայացնելով և մեթոդաբանությունը, և հաշվարկը ստուգելու համար անհրաժեշտ նյութերը: Մինչ այժմ երբևէ չի արձանագրվել կամ ապացուցվել, որ ԻՔՄ հաշվարկները սխալ լինեն:

Հասմիկ Համբարձումյան