Politik.am-ի կեղծ պնդումները Նավալնու գոյություն չունեցող հարցազրույցի մասին

Politik.am կայքը հուլիսի 2-ին հոդված է հրապարակել, որում ասվում է, թե Հանրային հեռուստաընկերության եթերում ռուս ընդդիմադիր գործիչ Ալեքսեյ Նավալնու «աղմկահարույց հարցազրույցը» պատրաստվել է անձամբ վարչապետ Նիկոլ Փաշինյանի հրահանգով։

Հղում անելով հղում անելով իր աղբյուրներին՝ կայքը գրել է. «Ի դեպ, Նավալնիի հետ կապ են հաստատել ՀՀ վարչապետի «Հանրային կապերի և տեղեկատվության կենտրոն» ՊՈԱԿ-ից և պետական մակարդակով կազմակերպել հարցազրույցը»:

Նշենք, որ հուլիսի 1-ին Հանրային հեռուստաընկերությունը ռեպորտաժ էր հեռարձակել՝ Ռուսաստանում տեղի ունեցած սահմանադրական փոփոխությունների հանրաքվեի վերաբերյալ։ «Համառուսաստանյան հանրաքվեի վերջին և գլխավոր օրը. ընդդիմության և իշխանության տեսակետը» վերնագրով ռեպորտաժում հեղինակն անդրադառնում է սահմանադրական փոփոխությունների հանրաքվեի բուն պրոցեսին, ներկայացնում դրանց վերաբերյալ քվեարկողների կարծիքը, մեջբերումներ անում ՌԴ նախագահ Վլադիմիր Պուտինի ելույթից, ինչպես նաև ներկայացնում ընդդիմադիր գործիչ Ալեքսեյ Նավալնու կարծիքը ՍԴ փոփոխությունների վերաբերյալ։ 

Politik.am-ը, սակայն, պնդում է, որ Նավալնու հետ Հանրային հեռուստաընկերությունը հարցազրույց է արել, որը կազմակերպել է «Հանրային կապերի և տեղեկատվության կենտրոն» ՊՈԱԿ-ը։ 

Մինչդեռ, ուսումնասիրելով ռեպորտաժում Ալեքսեյ Նավալնու մեջբերման մասը, պարզ է դառնում, որ այն ոչ թե «էքսկլյուզիվ» հարցազրույց է Հանրայինին, այլ ընդամենը՝ ընդդիմադիր գործչի ավելի վաղ արված տեսաուղերձից մի հատված։ 

Դեռ հունիսի 15-ին Նավալնին Յութուբի իր Навальный LIVE ալիքում հրապարակել էր «Նավալնին այն մասին, թե ինչ պետք է անել Սահմանադրական փոփոխությունների հանրաքվեի հետ» վերնագրով տեսաուղերձը, որից էլ Հանրայինի լրագրողն իր ռեպորտաժում մեջբերել էր «աղմկահարույց» հատվածը։ 

Այսպիսով, Politik.am կայքի պնդումը, թե Նավալնու «աղմկահարույց հարցազրույցը» պատրաստվել է անձամբ վարչապետ Նիկոլ Փաշինյանի հրահանգով, չի համապատասխանում իրականությանը, քանի որ հարցազրույց, առհասարակ, չի եղել։ 

Անի Գրիգորյան