Շուշի-Նախիջևան երկաթգիծ նախատեսված չէ․ գոնե առայժմ

Համացանցում նոյեմբերի 17-ին տարածվել է մի քարտեզ, ըստ որի` Ադրբեջանը նախատեսում է երկաթգիծ կառուցել Բաքու-Աղդամ-Շուշի-Նախիջևան ուղղությամբ։ Համացանցի հայկական տիրույթում այն տարածել են analitik.am լրատվական կայքը և արդարադատության նախկին նախարար Հովհաննես Մանուկյանը։

Ըստ նախկին նախարար Մանուկյանի՝ Ալիևն այս երկաթուղու կառուցման մասին հայտարարել է այսօր՝ Խուդաֆերինի կամուրջ այցելության ժամանակ։ «Այս կովկասյան թուրքը Ջաբրայիլ և Ֆիզուլի կատարած այցի ժամանակ ասել է, որ հայերը ապրելու են բազմազգ Ադրբեջանում մնացած ազգերի հետ, և ներկայացրել է Բաքու-Աղդամ-Շուշի-Նախիջևան երկաթգծի նախագիծը, որն իբր շուտով պիտի կառուցվի: Ի դեպ, Մեղրիի տարածքով»,- գրել է նա։

Այդպիսի նախագիծ, սակայն, չի ներկայացվել Ադրբեջանի նախագահի կողմից։ Ալիևը միայն հայտարարել է Ֆիզուլի-Շուշի ճանապարհի մասին։ Ադրբեջանական լրատվականներում ևս այս մասին որևէ լուր կամ տեղեկություն չկա, և անհասկանալի է, թե ինչ աղբյուրի հիման է վրա են նախկին նախարարն ու analitik.am-ը հրապարակում այս տեղեկությունը։  

Նոյեմբերի 1-ին «Ադրբեջանի երկաթուղիներ» ընկերությունը հրապարակել էր տեսանյութ՝ հայտնելով, որ նախատեսում է ապագայում գործարկել Եվլախ-Ստեփանակերտ երկաթգիծը, որը գոյություն է ունեցել խորհրդային ժամանակաշրջանում։ Ադրբեջանը սրանից բացի երկաթգծի այլ նախագիծ չի ներկայացրել մինչ օրս։

Հովհաննես Նազարեթյան