Գիշերը ՌԴ միջնորդությամբ հրադադարի պաշտոնական պայմանավորվածություն չի եղել, առավոտվա պայմանավորվածությունը չի պահպանվում

Սեպտեմբերի 13-ի գիշերը՝ ժամը 01։00-ին, ՊՆ մամուլի քարտուղարը հաղորդեց, որ ժամը 00։05-ից Ադրբեջանի ԶՈՒ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ և որ հակառակորդը կիրառում է նաև ԱԹՍ-ներ:

Մարտական գործողությունները և դիրքային մարտերը շարունակվեցին ամբողջ գիշեր։ Դրան զուգահեռ՝ տեղեկություն տարածվեց, թե իբր Ռուսաստանի միջնորդությամբ հրադադար է հաստատվել և ժամը 02։30-ից պետք է գործի հրադադարը։ Այս տեղեկությունը բավականին ակտիվ տարածում գտավ սոցիալական ցանցերում, մասնավորապես՝ Ֆեյսբուքում։

Սակայն, իրականում, գիշերը Ռուսաստանի միջնորդությամբ հրադադար հաստատվելու մասին պաշտոնական որևէ հաղորդագրություն չի եղել։

Ուսումնասիրությունից պարզ դարձավ, որ այս տեղեկության սկզբնաղբյուրը բլոգեր Միկա Բադալյանին պատկանող տելեգրամ ալիքն է։ Տեղեկությունը տարածել են նաև operativ.am, a1news.am կայքերը։ Նշված տեղեկությունը տարածել է նաև լրագրող Նաիրի Հոխիկյանը, որին հղում անելով՝ տեղեկությունը արտատպել է նաև mamul.am-ը։

Արդեն այսօր ժամը 11։05-ին Ռուսաստանի ԱԳՆ-ն հաղորդագրություն տարածեց, որտեղ նշված էր, որ պայմանավորվածություն է ձեռք բերվել այսօր ժամը 09։00-ից հրադադար հաստատելու մասին․ «Մենք ակնկալում ենք, որ Մոսկվայի ժամանակով 09։00-ից հրադադարի մասին Ռուսաստանի միջնորդությամբ ձեռք բերված պայմանավորվածությունը կիրականացվի ամբողջությամբ»,- մասնավորապես, նշվում է ՌԴ ԱԳՆ հաղորդագրության մեջ։

Թեև ըստ հայտարարության, ՌԴ միջնորդությամբ հրադադարի մասին պայմանավորվածություն է ձեռք բերվել, սակայն վարչապետ Փաշինյանն այսօր ԱԺ-ում իր ելույթում նշեց, որ երկու ուղղություններով մարտերը դեռևս չեն դադարել։ 

«Ըստ էության, այս պահի դրությամբ (11։30,-խմբ) մարտական գործողությունների ինտենսիվությունը նվազել է, բայց մեկ-երկու ուղղություններով Ադրբեջանի հարձակումները շարունակվում են»,- իր ելույթում ասել է վարչապետը։

Փաստացի, ՌԴ միջնորդությամբ ձեռք բերված հրադադարի պայմանավորվածությունը չի պահպանվել։

Այսպիսով՝ դեռևս գիշերը տարածված տեղեկությունը, թե Ռուսաստանի միջնորդությամբ ժամը 02։30-ի դրությամբ հրադադարի պայմանավորվածություն է ձեռք բերվել, սխալ է․ ՌԴ միջնորդությամբ հրադադարի պայմանավորվածություն եղել է ժամը 09։00 դրությամբ, որը չի պահպանվել։

Նարեկ Մարտիրոսյան