Իրանի դեսպանատանը հայ պաշտոնյաներ եղել են, սգո մատյանում գրառում արել են․ սխալ պնդում՝ 24news.am-ի եթերում

24news.am-ի՝ մարտի 6-ին հրապարակված հարցազրույցում բանախոս Կարեն Քոչարյանը պնդել է, թե Հայաստանի ոչ մի պաշտոնյա ցավակցական գրառում չի արել Իրանի՝ արդեն նախկին գերագույն հոգևոր առաջնորդ այաթոլա Ալի Խամենեիի, իրանցի այլ պետական պաշտոնյաների և խաղաղ բնակիչների զոհվելու կապակցությամբ ՀՀ-ում Իրանի դեսպանատանը բացված սգո մատյանում։ 

«Եթե Իրանն այս ամենից պատվով դուրս գա, իրենց (նկատի ունի՝ ՀՀ իշխանությանը, -խմբ․) կհիշեցնի։ Արդեն 2-3 օր է ՀՀ-ում Իրանի դեսպանատանը բացվել է սգո մատյան, և որևէ պետական գործիչ չի այցելել այնտեղ, գրառում չի արել․․․[Ադրբեջանի նախագահ Իլհամ] Ալիևը գնացել, իրենց դեսպանատանը գրառումն արել է։ Քանի որ այստեղ ինքնուրույն ոչինչ չեն կարողանում անել, դա էլ չեն կարողանում անել»,- ասել է բանախոսը։ 

«Փաստերի ստուգման հարթակը» պարզել է, որ նրա այս պնդումը չի համապատասխանում իրականությանը։ 

Այսպես, մարտի 4-ին News.am լրատվամիջոցի տեսախցիկն արձանագրել է, որ ՀՀ անվտանգության խորհրդի քարտուղար Արմեն Գրիգորյանը եղել է ՀՀ-ում Իրանի դեսպանատանը՝ գրառում թողնելով սգո մատյանում։ 

Բացի այդ, Հայաստանում Իրանի դեսպանատունը X-ի իր էջում տեղեկացրել է նաև ՀՀ պաշտպանության նախարար Սուրեն Պապիկյանի ու ՀՀ արտաքին գործերի փոխնախարար Վահան Կոստանյանի՝ դեսպանատուն այցելելու ու սգո մատյանում գրառում կատարելու մասին։

 

در دومین روز دفتر یادبود گشوده شده در سفارت جمهوری اسلامی ایران در بزرگداشت رهبر شهید جمهوری اسلامی ایران و شهروندان ایرانی از جمله دختران دانش آموز مدرسه میناب، مقامات جمهوری ارمنستان و اقشار مختلف مردم این کشور با حضور در سفارت جمهوری اسلامی ایران در ایروان، دفتر یادبود را امضا… pic.twitter.com/507FMguc0y

— IRI Embassy in Armenia (@iraninyerevan) March 5, 2026

 

Սրան զուգահեռ, ՀՀ վարչապետ Նիկոլ Փաշինյանը, ի տարբերություն Ադրբեջանի նախագահի, անձամբ գրառում չի թողել մատյանում։

Ե՞րբ է ցավակցել Փաշինյանը 

24news.am-ի լրագրողն իր հերթին պնդել է, թե Փաշինյանը Խամենեիի մահից 2-3 օր հետո է ցավակցական հեռագիր հղել։ 

Այսպես, Խամենեին ամերիկյան հարվածների հետևանքով զոհվել է փետրվարի 28-ին, սակայն, իրանական կողմը մեկ օր շարունակ չէր հաստատում այդ լուրը․ արդեն մարտի 1-ին Թեհրանը պաշտոնապես հաստատեց գերագույն հոգևոր առաջնորդի զոհվելու փաստը։ 

Փաշինյանը, ըստ այդմ, ցավակցական հեռագիր է հղել պաշտոնական հաստատման հաջորդ օրը՝ մարտի 2-ին։ 

Այսպիսով, 24news.am-ի եթերում հնչած պնդումները սխալ են և չեն համապատասխանում իրականությանը։ 

Նանե Մանասյան