Ռուսական քարոզչությունը մանիպուլացնում է նախընտրական արշավը Ֆրանսիայում

Փետրվարի 2-ին ռուսական պետական ТАСС գործակալությունը տեղեկատվություն տարածեց այն մասին, որ  Ֆրանսիայի նախագահի թեկնածու Հանրապետական կուսակցության ներկայացուցիչ Ֆրանսուա Ֆիյոնը Շարլեվիլ-Մեզյեր քաղաքում իր նախընտրական հանրահավաքի ժամանակ հայտարարել է, թե ցանկանում է չեղարկել Ռուսաստանի նկատմամբ «հիմար» պատժամիջոցները, քանի որ դրանք վնասում են ֆրանսիացի ֆերմերներին։

Այս տեղեկատվությունը, լայնորեն, տարածվեց հիմնականում ռուսական լրատվամիջոցների կողմից։ Ընդ որում, այնպիսի լրատվամիջոցներով, որոնք համարվում են ռուսական քարոզչության հիմնական գործիքները, այն է՝ Вести, НТВ, Звезда և այլն։ Բացի սա, սույն տեղեկատվությունն անգլերեն լեզվով գտնելու փորձերը հանգեցրեցին այն արդյունքին, որ այդ մասին գրել է միայն Russia Today-ը՝ Արևմուտքում ՌԴ հիմնական քարոզչական բարձրախոսը։

Մեր բոլոր փորձերը գտնելու նշված տեղեկատվությունը ֆրանսերենով անցան ապարդյուն։ Շարլեվիլ-Մեզյերում տեղի ունեցած հանրահավաքի մասին նյութերում չկան այնպիսի ձևակերպումներ, որոնց մասին հաղորդել է ТАСС-ը։

Ըստ այդմ, կարելի է հերթական անգամ եզրակացնել, որ ռուսական քարոզչությունը ներկայում սևեռված է Ֆրանսիայում սպասվող նախագահական ընտրությունների վրա։ Մանիպուլացնելով տեղեկատվությունը, ինչպես Ֆիյոնի Շարլեվիլ-Մեզյերում ունեցած հանրահավաքի դեպքում՝ ռուսական քարոզչամեքենան ցանկանում է այնպիսի ինֆորմացիոն ֆոն ստեղծել, որ Ֆրանսիայի նախագահի թեկնածուն պրոռուսական է։ Հետաքրքիր է, որ ՌԴ-ն Ֆրանսիայում բացի Ֆիյոնից ունի այլ, ավելի վառ արտահայտված լծակ ևս՝ ի դեմս ազգայնականների առաջնորդ Մարին Լե Պենի, որի շուրջ տեղեկատվությունը նույնպես կրում է պրոռուսական բնույթ։