Ստեր հայ-ռուսական համատեղ զորախմբի հրամանատարից

Մայիսի 6-ին Հայ-ռուսական զորքերի միացյալ խմբավորման հրամանատար, գեներալ-մայոր Անդրանիկ Մակարյանը «Սպուտնիկ Արմենիա» գործակալությունում հրավիրած մամուլի ասուլիսի ժամանակ իրականությանը չհամապատսխանող մի շարք հայտարարություններ արեց՝ համատեղ զորախմբի հետ կապված:

Մասնավորապես, ըստ Մակարյանի հայ-ռուսական համատեղ զորախումբը գործում է «միայն ու միայն Հայաստանի Հանրապետության զինված ուժերի գլխավոր գերագույն հրամանատարի հրամանով»:

Ավելին, «Ազատություն» ռադիոկայանի լրագրողի հարցին, թե արդյո՞ք պատերազմի դեպքում Ռուսաստանի նախագահ Վլադիմիր Պուտինը կարող է հրամայել զորամիավորմանը զերծ մնալ ռազմական գործողություններին մասնակցելուց՝ հայ-ռուսական միացյալ զորամիավորման հրամանատարը հավաստիացրեց․ «Չի կարող ասել, որովհետև արդեն Հայաստանի Հանրապետության նախագահի և Ռուսաստանի Դաշնության նախագահի համապատասխան որոշումներով մենք պատրաստ ենք գործողությունների դիմել: Առանց ասելու»:

Այս հարցը, սակայն, կարգավորված է Հայաստանի Հանրապետության և Ռուսաստանի Դաշնության զինված ուժերի զորքերի միացյալ խմբավորման մասին 2016թ. նոյեմբերի 30-ին ստորագրված համաձայնագրի անբաժանելի մաս հանդիսացող դրա հավելված կանոնակարգով: Մասնավորապես, կանոնակարգի 3-րդ («Միացյալ խմբավորման կառավարումը») բաժինը հստակ սահմանում է, որ խաղաղ ժամանակ միացյալ խմբավորման հրամանատարը ենթարկվելու է Հայաստանի զինված ուժերի գլխավոր շտաբի պետին, իսկ պատերազմի (կամ դրա իրական վտանգի) ժամանակ կամ Հայաստանի ԶՈւ գլխավոր շտաբի պետին, կամ Ռուսաստանի հարավային ռազմական օկրուգի հրամանատարին՝ կախված ստեղծված իրավիճակից:

Նույն բաժինը նաև սահմանում է, որ համատեղ զորախումբը առաջնորդվում է երկու երկրների գերագույն գլխավոր հրամանատարների, պաշտպանության նախարարների և գլխավոր շտաբերի պետերի հրամաններին:

Ավելին, կանոնակարգի 4-րդ բաժնում հստակ ամրագրված է, որ  Համատեղ զորքերի կիրառման որոշումը պետք է կայացնեն Հայաստանի և Ռուսաստաանի գերագույն գլխավոր հրամանատարները՝ համատեղ: Այլ կերպ ասած, եթե երկու երկրների ղեկավարներից որևէ մեկը դեմ լինի համատեղ զորքերի կիրառամանը, ապա դրանք չեն կիրառվի՝ անկախ նախապես ընդունված կարգերի:

Այլ կերպ ասած, հայ-ռուսական զորքերի միացյալ խմբավորման հրամանատար, գեներալ-մայոր Անդրանիկ Մակարյանը ստել է, երբ ասել է, որ ենթարկվում է միմիայն Հայաստանի գերագույն գլխավոր հրամանատարի հրամաններին և որ Ռուսաստանի նախագահը չի կարող հրամայել զորամիավորմանը զերծ մնալ ռազմական գործողություններին մասնակցելուց: